ഇടുക്കി: നീലപ്പട്ടണിഞ്ഞ് അതിസുന്ദരിയായി ഓണക്കാലത്തെ വരവേൽക്കുകയാണ് പൂപ്പാറയിലെ പുൽമേടുകൾ. തൊണ്ടിമല ദേശീയപാതയോരത്ത് നിന്നും 500 മീറ്റർ അകത്തേത്ത് സഞ്ചരിച്ചാൽ നീലവസന്തത്തിന്‍റെ മായാജാലം കണ്‍മുന്നില്‍ വിടരുകയായി. ശാന്തൻപാറ ഗ്രാമപഞ്ചായത്തിൽ അതിർത്തിഗ്രാമമായ തൊണ്ടിമലയിലെ പുൽമേടുകളിലും മൊട്ടകുന്നുകളിലുമാണ് ഇത്തവണ നീലക്കുറിഞ്ഞി പൂത്തിരിക്കുന്നത്.
2018ൽ മൂന്നാർ രാജമലയിലെ നീലക്കുറിഞ്ഞി വസന്തത്തെ പ്രളയം കവർന്നെങ്കിലും പ്രത്യാശയുടെ വർണക്കുട ചൂടി പൂപ്പാറ തൊണ്ടിമലയിലെ സ്വകാര്യ ഭൂമിയിൽ ഏക്കറുക്കണക്കിന് പുൽമേടുകളിലാണ് നീലക്കുറിഞ്ഞി പൂവിട്ടിരിക്കുന്നത്. കൊച്ചി-ധനുഷ്‌കോടി ദേശീയപാതയിൽ തൊണ്ടിമലയിൽ നിന്നും ഒരു കിലോമീറ്ററോളം അകലെ പശ്ചിമഘട്ട മലനിരയുടെ ഭാഗമായ മലയിലാണ് ഈ കാഴ്‌ച. മൂന്ന് ഏക്കറോളം വ്യാപിച്ച് കിടക്കുന്ന മനോഹര ദൃശ്യം കാണാൻ നിരവധി സഞ്ചാരികളാണ് എത്തുന്നത്. ഇവിടെ നിന്നാൽ ആനയിറങ്കൽ ജലാശയത്തിന്‍റെ ഹൃദയംഗമമായ ദൃശ്യവും സഞ്ചാരികൾക്ക് കാണാം. ശാന്തൻപാറ പഞ്ചായത്തിലെ പുത്തടി മലനിരകളിലും ഒരു മാസം മുൻപ് നീലക്കുറിഞ്ഞികൾ വിടർന്നിരുന്നു.
