ഇടുക്കി :കരുണാപുരം പഞ്ചായത്തില്‍, എന്‍.ഡി.എ ഘടകകക്ഷിയായ ബിഡിജെഎസിന്‍റെ പിന്തുണയില്‍ യു.ഡി.എഫിന് ഭരണം. പ്രസിഡന്‍റ് തെരഞ്ഞെടുപ്പില്‍ എട്ടിനെതിരെ ഒന്‍പത് വോട്ടുകള്‍ക്ക് എല്‍.ഡി.എഫിലെ വിന്‍സി വാവച്ചനെ പരാജയപ്പെടുത്തി കോണ്‍ഗ്രസിലെ മിനി പ്രിന്‍സ് പ്രസിഡന്‍റായി.
ബി.ഡി.ജെ.എസ് അംഗത്തിന് വൈസ് പ്രസിഡന്‍റ് പദവി നല്‍കിയാണ് യു.ഡി.എഫ് ഭരണം പിടിച്ചത്. വി. ബി.ഡി.ജെ.എസ് അംഗമായ ബിനു പി.ആര്‍ ആണ് വൈസ് പ്രസിഡന്‍റ്. ജില്ലയില്‍ ആദ്യമായാണ് ബി.ഡി.ജെ.എസ് ഒരു പഞ്ചായത്തിന്‍റെ ഭരണത്തില്‍ എത്തുന്നത്.
തദ്ദേശ തെരഞ്ഞെടുപ്പില്‍ നെടുങ്കണ്ടം ബ്ലോക്ക് പഞ്ചായത്തിലെ മുഴുവന്‍ പഞ്ചായത്തുകളും ബ്ലോക്ക് പഞ്ചായത്തുകളും യു.ഡി.എഫിന് നഷ്ടമായിരുന്നു. എല്‍.ഡി.എഫും യു.ഡി.എഫും തുല്യ വാര്‍ഡുകളില്‍ വിജയിച്ച കരുണാപുരം നറുക്കെടുപ്പിലൂടെയാണ് എല്‍.ഡി.എഫിന് ലഭിച്ചത്. അന്ന് പ്രസിഡന്‍റ് തെരഞ്ഞെടുപ്പില്‍ നിന്നും ബി.ഡി.ജെ.എസ് അംഗം വിട്ടുനില്‍ക്കുകയായിരുന്നു.