ഇടുക്കി:പ്രളയം തകര്‍ത്ത മാങ്കുളം ആറാംമൈലിലെ തൂക്കുപാലം വീണ്ടും പുനര്‍ നിര്‍മ്മിച്ചു. മാങ്കുളം ആറാംമൈലില്‍ ജോര്‍ജ്ജിയാര്‍ പള്ളിക്ക് സമീപം നല്ലതണ്ണിയാറിന് കുറുകെയായിരുന്നു ആട്ടുപാലമെന്ന് നാട്ടുകാര്‍ വിളിക്കുന്ന പഴയ തൂക്കുപാലം സ്ഥിതി ചെയ്‌തിരുന്നത്. പ്രളയത്തിൽ തകർന്ന പഴയ പാലത്തിന്‍റെ പ്രാധാന്യം കണക്കിലെടുത്താണ് പഞ്ചായത്ത് അധികൃതർ പുതിയ തൂക്കുപാലം നിര്‍മ്മിച്ചത്.
പ്രളയം തകര്‍ത്ത മാങ്കുളം ആറാംമൈലിലെ തൂക്കുപാലം പുനര്‍നിര്‍മ്മിച്ചു
പ്രദേശവാസികള്‍ ആറിനക്കരെ കടക്കുവാൻ ഏറ്റവുമധികം ആശ്രയിച്ചിരുന്നത് ഈ തൂക്കുപാലത്തെയായിരുന്നു. കൂടാതെ മാങ്കുളത്തേക്കെത്തുന്ന വിനോദ സഞ്ചാരികളുടെ പ്രധാന ആകര്‍ഷണ കേന്ദ്രം കൂടിയായിരുന്നു ഈ തൂക്കുപാലം. പാലത്തില്‍ കയറി ചിത്രം പകര്‍ത്തുവാനും പുഴയുടെ ഭംഗി ആസ്വദിക്കാനും ദിവസവും ധാരാളം സഞ്ചാരികളാണ് ഇവിടേക്ക് എത്തിയിരുന്നത്.