ഇടുക്കി: വിനോദ സഞ്ചാരികളുടെ സ്വപ്‌ന ഭൂമിയാണ് മൂന്നാറിലെ ലോഹാർട്ട് എസ്റ്റേറ്റും ഗ്യാപ്പ് റോഡും. ദേശീയപാത വികസനത്തിന്‍റെ ഭാഗമായി കൊച്ചി -ധനുഷ് കോടി ദേശീയപാത നവീകരിച്ചതോടെയാണ് ഇവിടം സഞ്ചാരികളുടെ ഇഷ്‌ട കേന്ദ്രമായത്. മകര മാസത്തിലെ മഞ്ഞും കുളിരും ആവോളം ആസ്വദിക്കാന്‍ സ്വദേശികളും വിദേശികളുമായി നിരവധി പേരാണ് എസ്‌റ്റേറ്റിലെത്തുന്നത്.
ഗ്യാപ്പ് റോഡ്, ലാക്കാട് വ്യൂ പോയിന്‍റാണ് സഞ്ചാരികളെ പ്രധാനമായും ആകര്‍ഷിക്കുന്നത്. മൂന്നാറിന്‍റെ വിവിധയിടങ്ങളിലെ വിദൂര ദൃശ്യങ്ങള്‍ വ്യൂ പോയിന്‍റിലെത്തിയാല്‍ കാണാനാകും. മൂന്നാർ -ദേവികുളം പാതയിലെ കൊച്ചി -ധനുഷ്‌കോടി ദേശീയ പാതയിലൂടെ 7 കിലോമീറ്ററോളം സഞ്ചരിച്ച് പ്രകൃതി ഭംഗി ആസ്വദിക്കാനും സഞ്ചാരികള്‍ക്കാകും.
മധ്യ വേനല്‍ അവധി കഴിയുന്നത് വരെ മേഖലയില്‍ തുടര്‍ച്ചയായി സഞ്ചാരികളെത്തുമെന്നാണ് പ്രതീക്ഷ. എസ്റ്റേറ്റ് സഞ്ചാരികളുടെ ഇഷ്‌ട കേന്ദ്രമായത് കൊണ്ട് തന്നെ ചെറുകിട വ്യാപാര മേഖലയും ഉണർവിന്‍റെ പാതയിലാണിപ്പോള്‍.
