മൂന്നാറിൽ പുലി ഇറങ്ങിയതായി ആശങ്ക; ഭീതിയിൽ പ്രദേശവാസികൾ

ലയങ്ങള്‍ക്ക് സമീപം പുലിയുടേതിന് സമാനമായ കാല്‍പ്പാദങ്ങള്‍ കണ്ടതാണ് ആശങ്കക്കും അഭ്യൂഹത്തിനും ഇടവരുത്തിയത്.

ഇടുക്കി:മൂന്നാറിൽ പുലി ഇറങ്ങിയതായി ആശങ്ക. കടലാർ ഈസ്റ്റ് ഡിവിഷനിലാണ് പുലി ഇറങ്ങിയതായുള്ള ആശങ്ക പരന്നിട്ടുള്ളത്. ലയങ്ങള്‍ക്ക് സമീപം പുലിയുടേതിന് സമാനമായ കാല്‍പ്പാദങ്ങള്‍ കണ്ടതാണ് ആശങ്കക്കും അഭ്യൂഹത്തിനും ഇടവരുത്തിയത്.

ഇക്കാര്യത്തിൽ വനംവകുപ്പ് സ്ഥിരീകരണം നടത്തണമെന്നും പുലി ഇറങ്ങിയെങ്കിൽ പിടികൂടുവാൻ നടപടി വേണമെന്നും പ്രദേശവാസികൾ ആവശ്യം ഉന്നയിക്കുന്നു. മൂന്നാറുമായി ചേർന്ന് കിടക്കുന്ന തോട്ടം മേഖലയിലെ വന്യജീവി ശല്യത്തിന് ഇനിയും പരിഹാരം കണ്ടെത്തിയിട്ടില്ല. ഏതാനും ദിവസങ്ങൾക്ക് മുൻപും വന്യജീവി ആക്രമണത്തിൽ ഇവിടെ പശു ചത്തിരുന്നു.

30ലധികം പശുക്കൾ തോട്ടംമേഖലയിൽ വന്യജീവി ആക്രമണത്തിൽ കൊല്ലപ്പെട്ടിട്ടുണ്ടെന്ന് തൊഴിലാളികൾ പറയുന്നു. പശുക്കൾക്ക് നേരെയുണ്ടാകുന്ന ആക്രമണം മനുഷ്യർക്ക് നേരെ ഉണ്ടാകുമോ എന്ന ആശങ്കയിലാണ് തോട്ടം തൊഴിലാളികൾ. വിഷയത്തിൽ ബന്ധപ്പെട്ട വകുപ്പുകൾ ഇടപെടൽ നടത്തണമെന്നും നാട്ടുകാർ പറയുന്നു.