കലോത്സവ കലവറയിൽ രുചിയുടെ കൈപുണ്യം

പാചകമേഖലയില്‍ 40 വര്‍ഷത്തെ പരിചയസമ്പത്താണ് പരമേശ്വരന്‍ നായര്‍ക്കുള്ളത്.

ഇടുക്കി: ഇരുപത് വർഷമായി ഇടുക്കി ജില്ലാ സ്കൂൾ കലോത്സവ കലവറയിൽ നിറസാന്നിധ്യമാണ് തൃപ്പൂണിത്തുറ പരമേശ്വരൻ നായർ. പാചകത്തിലെ കൈപ്പുണ്യമാണ് അദ്ദേഹത്തെ വർഷങ്ങളായി കലോത്സവ നഗരിയിലെത്തിക്കുന്നത്. കുടുംബസമേതമുള്ള പ്രവർത്തന വിജയമാണ് പരമേശ്വരൻ നായരുടെ ഭക്ഷണ രുചിയുടെ രഹസ്യം. പാചകമേഖലയില്‍ 40 വര്‍ഷത്തെ പരിചയസമ്പത്താണ് പരമേശ്വരന്‍ നായര്‍ക്കുള്ളത്. 20 വർഷം മുമ്പ് തൊടുപുഴ മുതലക്കോടത്ത് നടന്ന ജില്ലാ സ്കൂൾ കലോത്സവം മുതൽ എല്ലാ വർഷവും പരമേശ്വരൻ നായർ തന്നെയാണ് ഭക്ഷണം ഒരുക്കുന്നത്.

തന്‍റെ കുടുംബമാണ് തനിക്ക് കരുത്തായി കൂടെ നില്‍ക്കുന്നതെന്ന് അദേഹം പറയുന്നു. ഇത്തവണ ആറ് കൂട്ടം കറികളും ഗോതമ്പും അടയും അടങ്ങുന്ന രണ്ടു കൂട്ടം പായസത്തോടെയുമാണ് ഭക്ഷണം തയ്യാറാക്കുന്നത്. ഒരു നേരം 3000 ആളുകൾക്കാണ് ഭക്ഷണം തയ്യാറാക്കുന്നത്. വരും വർഷങ്ങളിലും കലോത്സവ കലവറ തനിക്കു തന്നെയെന്ന് ഉറപ്പിച്ചിരിക്കുകയാണ് ഈ പാചക കലാകാരൻ.