ജോയിന്‍റ് ആര്‍ടി ഓഫിസ് തകർത്ത സംഭവം
ഇടുക്കി : നെടുങ്കണ്ടം ജോയിന്‍റ് ആര്‍ടി ഓഫിസിലെ കൗണ്ടറുകള്‍ തകർത്ത സംഭവത്തിൽ ഡ്രൈവിങ് സ്‌കൂള്‍ ഉടമ അറസ്‌റ്റിൽ. നെടുങ്കണ്ടം എസ്എസ് ഡ്രൈവിങ് സ്‌കൂള്‍ ഉടമ ചന്ദ്രനാണ് പിടിയിലായത്. കഴിഞ്ഞ 17നാണ് (17-1-2023) രണ്ട് ഡ്രൈവിങ് സ്‌കൂള്‍ ഉടമകള്‍ ജോയിന്‍റ് ആര്‍ടി ഓഫിസില്‍ എത്തി ബഹളംവയ്ക്കുകയും കൗണ്ടറുകള്‍ക്ക് കേടുപാടുകള്‍ വരുത്തുകയും ചെയ്‌തത്.
അന്നേദിവസം നടന്ന ഫിറ്റ്‌നസ് ടെസ്‌റ്റിൽ ഒരു വാഹനത്തില്‍ അനധികൃതമായി ചില ഭാഗങ്ങള്‍ ഘടിപ്പിച്ചിരുന്നത് ഉദ്യോഗസ്ഥര്‍ കണ്ടെത്തിയിരുന്നു. ഇത് നീക്കം ചെയ്യാന്‍ ആവശ്യപ്പെടുകയും ചെയ്‌തു. എന്നാല്‍ പിന്നീട് സംഭവവുമായി ബന്ധമില്ലാത്ത ഡ്രൈവിങ് സ്‌കൂള്‍ ഉടമകള്‍ ഓഫിസില്‍ എത്തി പ്രശ്‌നമുണ്ടാക്കുകയായിരുന്നു.