ഇടുക്കി: പൂപ്പാറയിലെ വ്യാപാര സ്ഥാപനത്തില്‍ നിന്നും പണവും ഏലക്കയും മോഷ്‌ടിച്ച സംഭവത്തിൽ പ്രതി പിടിയിൽ. തമിഴ്‌നാട് തേവാരം സ്വദേശി ഈശ്വരനാണ് പിടിയിലായത്. ഏലക്ക വ്യാപാരി എന്ന വ്യാജേന സ്ഥാപനത്തില്‍ എത്തി പരിചയം സ്ഥാപിച്ചാണ് ഇയാള്‍ മോഷണം നടത്തിയത്.
കഴിഞ്ഞ മാര്‍ച്ച് 31നാണ് പൂപ്പാറയിലെ മലഞ്ചരക്ക് വ്യാപാര സ്ഥാപനത്തില്‍ നിന്നും 50 കിലോ ഏലക്കയും അന്‍പതിനായിരം രൂപയും മോഷണം പോയത്. ഇടുക്കിയില്‍ നിന്നും ഏലക്ക വാങ്ങി തമിഴ്‌നാട്ടില്‍ എത്തിച്ച് കച്ചവടം നടത്തുന്ന വ്യാപാരി എന്ന നിലയിലാണ് ഇയാള്‍ പൂപ്പാറയില്‍ എത്തിയത്. സ്ഥാപന ഉടമയുമായി സൗഹൃദം സ്ഥാപിച്ച ശേഷം ഉടമ ഇല്ലാത്ത സമയത്ത് മോഷണം നടത്തുകയായിരുന്നു.