മൂന്നാറില്‍ മാലിന്യ പ്രശ്നം രൂക്ഷം

വിലക്ക് നീങ്ങി വിനോദ സഞ്ചാര മേഖല തുറന്ന് നല്‍കിയത് വലിയ പ്രതീക്ഷയാണ് മൂന്നാറടക്കമുള്ള വിനോദ സഞ്ചാര മേഖലകള്‍ക്ക് പകര്‍ന്നു നല്‍കിയത്. എന്നാല്‍ സഞ്ചാരികളുടെ തിരക്ക് വര്‍ധിച്ചതോടെ മേഖലകളില്‍ മാലിന്യ പ്രശ്‌നവും രൂക്ഷമാവുകയാണ്

ഇടുക്കി: വിനോദ സഞ്ചാരികളുടെ വരവ് വര്‍ദ്ധിച്ചതോടെ മൂന്നാറില്‍ മാലിന്യ പ്രശ്നവും രൂക്ഷമാകുന്നു. പഞ്ചായത്ത് അധികൃതര്‍ മാലിന്യ നിര്‍മാര്‍ജനത്തിന് പലവിധ പദ്ധതികള്‍ ആവിഷ്കരിക്കുമ്പോഴും ഇവിടേക്കെത്തുന്ന സഞ്ചാരികള്‍ റോഡരികിലും വിനോദ സഞ്ചാര കേന്ദ്രങ്ങളിലും അലക്ഷ്യമായി മാലിന്യങ്ങള്‍ വലിച്ചെറിയുന്നത് തുടരുകയാണ് . വഴിയോരങ്ങളിലും വിനോദ സഞ്ചാര കേന്ദ്രങ്ങളിലും വേസ്റ്റ് ബിന്നുകള്‍ സ്ഥാപിച്ചിട്ടുണ്ടെങ്കിലും ഇവ നോക്കുകുത്തികളായി മാറുകയാണ്.

മാലിന്യങ്ങള്‍ വലിച്ചെറിയുന്നത് തടയുന്നതിനായി പരിശോധനകള്‍ ശക്തമാക്കണമെന്നും മാലിന്യ നിക്ഷേപകര്‍ക്കെതിരേ കര്‍ശന നിയമ നടപടി സ്വീകരിക്കണമെന്ന ആവശ്യവും ശക്തമാണ്.