സ്വന്തമായി അടച്ചുറപ്പുള്ള ഒരു വീട് എന്നത് സ്വപ്‌നം, അധികൃതരുടെ കനിവ് കാത്ത് ഒരു കുടുംബം

ഇടുക്കി തൂക്കുപാലം രത്തിനക്കുഴി സ്വദേശി അശോകിന്‍റെ വീടാണ് കഴിഞ്ഞ ദിവസം പെയ്‌ത മഴയിൽ നിലം പൊത്തിയത്. അതിനാൽ പറക്കമുറ്റാത്ത കുട്ടികളുമായി എങ്ങോട്ട് പോകുമെന്ന് അറിയാത്ത അവസ്ഥയിലാണ് ഈ കുടുംബം.

ഇടുക്കി: തൂക്കുപാലം രത്തിനക്കുഴി സ്വദേശികളായ അശോകും രജനിയും അധികൃതരുടെ കനിവിനായി അപേക്ഷിക്കുവാൻ തുടങ്ങിയിട്ട് നാളുകളേറെയായി. സ്വന്തമായി അടച്ചുറപ്പുള്ള ഒരു വീട് എന്ന ആവശ്യമാണ് ഇവർക്കുള്ളത്.

മൺകട്ട കെട്ടിയ പതിറ്റാണ്ടുകൾ പഴക്കമുള്ള കുടിൽ കഴിഞ്ഞ ദിവസം രാത്രിയിൽ പെയ്ത മഴയിൽ നിലംപൊത്തി. ഇതോടെ ഭാര്യ രജനിയും മക്കളായ അഖിലേഷും അനന്യയും അടങ്ങുന്ന കുടുംബം പെരുവഴിയിലായി.

മെട്ടിൻപുറത്ത് കൃഷിയോഗ്യമല്ലാതെ തരിശുഭൂമിയായി കിടക്കുന്ന 70 സെൻ്റ് വസ്തു ഇവരുടെ പേരിൽ ഉണ്ടെന്നാണ് വീട് നൽകാൻ അധികൃതർ ഉന്നയിക്കുന്ന തടസവാദം. അനർഹർ ലൈഫ് ഭവന പദ്ധതിയിൽ അടക്കം വീടുകൾ കൈപ്പറ്റുന്നു എന്ന ആക്ഷേപം നിലനിൽക്കുന്ന സാഹചര്യത്തിലാണ് അത് ലഭിക്കാൻ പൂർണ അർഹരായവർ പിന്തള്ളപ്പെടുന്നത്.