ഇടുക്കി:ശിലായുഗം മുതൽ കുടിയേറ്റം വരെ അതിജീവനത്തിന്‍റെ ചരിത്രം നിറഞ്ഞ് നില്‍ക്കുന്ന മണ്ണാണ് ഇടുക്കി. ശിലായുഗ കാലഘട്ടത്തിലേക്ക് വിരൽ ചൂണ്ടുന്ന നിരവധി അടയാളങ്ങളും അവശേഷിപ്പുകളാലും സമ്പന്നമാണ് ഇടുക്കിയുടെ മലനിരകൾ. മുനിയറകളും നന്നങ്ങാടികളുമെല്ലാം ഓരോ കാലഘട്ടത്തിലെ മനുഷ്യ ജീവിതങ്ങളുടെ കഥ പറയുന്ന ചരിത്ര ശേഷിപ്പുകളാണ്.
ഉരൽപ്പാറയിലെ ഉരലും.. ശിലായുഗത്തിന്‍റെ അടയാളപ്പെടുത്തലുകളും.. ഇടുക്കിയുടെ മടിത്തട്ടിലെ ചരിത്ര അവശേഷിപ്പുകൾ!!
ഇടുക്കിയുടെ മല മുകളുകളില്‍ ഇന്നും ചരിത്ര ഗവേഷകര്‍ കണ്ടെത്താത്ത നിരവധി അവശേഷിപ്പുകൾ ഉണ്ട്. അതിലൊന്നാണ് ശാന്തമ്പാറ പഞ്ചായത്തിലെ മൂലത്തറയിലെ ഉരല്‍പ്പാറ. വന്യത നിറഞ്ഞു നിൽക്കുന്ന മലമുകളിലെ പാറയിൽ കാണുന്ന ഉരലും ഇതിനു സമീപത്തെ അടയാളപ്പെടുത്തലുകളും കൗതുക കാഴ്‌ചകളായി നിലനിൽക്കുകയാണ്. ഉരൽ ആര് നിർമിച്ചെന്നോ, ഇതിന്‍റെ ചരിത്രമോ, അടയാളപ്പെടുത്തലുകളുടെ അർഥമോ ഒന്നും പ്രദേശവാസികൾക്കും നിശ്‌ചയമില്ല.