രാജകുമാരി പഞ്ചായത്തില്‍ കനത്ത മഴ; മുളംതണ്ട് അഞ്ചേക്കറില്‍ വ്യാപക നാശം

മുള്ളംതണ്ട് കുരിശുമല റോഡ് ഇടിഞ്ഞ് അഞ്ചേക്കർ സ്വദേശി ബിജു തോട്ടുപുറത്തിന്‍റെ വീട് അപകടാവസ്ഥയിലായി. അഞ്ചേക്കർ സ്വദേശികളായ സഹോദരങ്ങളുടെ മൂന്ന് ഏക്കറോളം കൃഷി ഭൂമി ഒലിച്ചുപോയി.

ഇടുക്കി:ശക്‌തമായ മഴയെ തുടർന്ന് രാജകുമാരി പഞ്ചായത്തിലെ മുള്ളംതണ്ട് അഞ്ചേക്കറിൽ വ്യാപക മണ്ണിടിച്ചലും കൃഷി നാശവും. മുള്ളംതണ്ട് കുരിശുമല റോഡ് ഇടിഞ്ഞ് അഞ്ചേക്കർ സ്വദേശി ബിജു തോട്ടുപുറത്തിന്‍റെ വീട് അപകടാവസ്ഥയിലായി.

റോഡിന്‍റെ വശം ഇടിഞ്ഞു വീടിന്‍റെ മുറ്റത്തേക്ക്‌ പതിക്കുകയായിരുന്നു. ഒരുവയസുള്ള കുട്ടിയും ഭാര്യയും ബിജുവുമാണ് ഇവിടെ കഴിയുന്നത്. മഴതുടർന്നാല്‍ റോഡ് ഇനിയും ഇടിയാനുള്ള സാധ്യതനിലനിൽക്കുന്നതിനാൽ ബിജുവിനോടും കുടുംബത്തോടും മാറി താമസിക്കാന്‍ പഞ്ചായത്ത് അധികൃതർ നിർദേശം നൽകി.

അഞ്ചേക്കർ സ്വദേശികളായ സഹോദരങ്ങളുടെ മൂന്ന് ഏക്കറോളം കൃഷി ഭൂമി ഒലിച്ചുപോയി. തോട്ടുപുറത്ത് ബിജു, ഷിജു, ഷാജു എന്നിവരുടെ കൃഷിയിടത്തിലാണ് വ്യാപകമായി നാശനഷ്ടം ഉണ്ടായത്. ഏലം കുരുമുളക് കാപ്പി തുടങ്ങിയ കൃഷിവിളകളും നശിച്ചു. കഴിഞ്ഞ ദിവസങ്ങളിൽ ശക്‌തമായ മഴയാണ് ഈ മേഖലയിലുണ്ടായത്.