ഇടുക്കി: കനത്ത മഴയില്‍ മണ്ണിടിച്ചില്‍ ഭീതിയില്‍ കഴിയുന്ന നിരവധി കുടുംബങ്ങളുണ്ട് ഇടുക്കിയില്‍. മഴ ശക്തി പ്രാപിക്കുമ്പോള്‍ അയല്‍ വീടുകളില്‍ അഭയം പ്രാപിയ്‌ക്കേണ്ട അവസ്ഥയിലാണ് ജില്ലയിൽ പലരും. തുടര്‍ച്ചയായി വീടിന് സമീപത്ത് നിന്നും മണ്ണിടിയുന്നതിന്‍റെ ആശങ്കയിലാണ് നെടുങ്കണ്ടം പരിവര്‍ത്തനമേട്ടിലെ രണ്ട് കുടുംബങ്ങള്‍.
മണ്ണിടിച്ചിൽ ഭീതിയിൽ പരിവര്‍ത്തനമേട്ടിലെ കുടുംബങ്ങള്‍
പരിവര്‍ത്തനമേട് സ്വദേശികളായ മന്നിക്കല്‍ ശശി, ഈന്തനാനിക്കല്‍ ഓമന എന്നിവരുടെ വീടുകളുടെ സമീപത്ത് പല തവണ മണ്ണിടിച്ചില്‍ ഉണ്ടായിട്ടുണ്ട്. മലമുകളില്‍ നിന്നും ഒഴുകിയെത്തുന്ന മഴവെള്ളം ഈ വീടുകളുടെ സമീപത്ത് കൂടിയാണ് കടന്ന് പോകുന്നത്. വെള്ളം ഇറങ്ങി, മണ്ണ് വിണ്ട് കീറി ഇരിയ്ക്കുന്നതും അപകടാവസ്ഥ വര്‍ധിപ്പിക്കുന്നു. രാത്രിയില്‍ കനത്ത മഴ പെയ്യുമ്പോള്‍ പ്രായമാവരും കുട്ടികളുമായി അയല്‍ വീടുകളിലേയ്ക്ക് പോകേണ്ട അവസ്ഥയിലാണ് ഇവര്‍.