ഇടുക്കിയില്‍ ഇരട്ടവോട്ട് ആരോപണത്തെ തുടര്‍ന്ന് സംഘര്‍ഷം

തമിഴ്‌നാട്ടില്‍ വോട്ട് രേഖപ്പെടുത്തിയ ശേഷം സമാന്തര പാതയിലൂടെ എത്തിയവരാണ് പൊലീസ് കസ്റ്റഡിയിലെടുത്ത സംഘത്തിലുള്ളതെന്നാണ് ആരോപണം

ഇടുക്കി: നെടുങ്കണ്ടത്ത് ഇരട്ടവോട്ട് ആരോപണത്തെ തുടര്‍ന്ന് സംഘര്‍ഷം. തമിഴ്‌നാട്ടില്‍ നിന്നും എത്തിയ ഒരു സംഘം ഇരട്ട വോട്ടിന് ശ്രമിച്ചെന്ന ആരോപണത്തെ തുടര്‍ന്നായിരുന്നു സംഘര്‍ഷം. വോട്ട് ചെയ്യാന്‍ എത്തിയവരെ കോൺഗ്രസ്, ബിജെപി പ്രവർത്തകർ തടഞ്ഞുവെച്ചു. വൻ സംഘർഷമുണ്ടായതിനെ തുടര്‍ന്ന് പൊലീസ് സ്ഥലത്തെത്തി. തമിഴ്‌നാട്ടില്‍ വോട്ട് രേഖപ്പെടുത്തിയ ശേഷം സമാന്തര പാതയിലൂടെ എത്തിയവരാണ് സംഘത്തിലുള്ളതെന്നും നാട്ടുകാര്‍ ആരോപിക്കുന്നു. തമിഴ്‌നാട്ടില്‍ വോട്ട് രേഖപ്പെടുത്തിയ മഷി മായ്ക്കുന്നതിനിടെയാണ് സംഘത്തെ പിടികൂടിയതെന്ന് നാട്ടുകാർ പറഞ്ഞു. ഇതേ തുടര്‍ന്ന് ജീപ്പിലെത്തിയ 14 പേരെ നെടുങ്കണ്ടം പൊലീസ് കസ്റ്റഡിയിലെടുത്തു.

ഉടുമ്പൻചോല മണ്ഡലത്തിൽ കള്ളവോട്ട് വ്യാപകമായി നടക്കുന്നതായി കോൺഗ്രസും ബിജെപിയും മുമ്പ് തെരഞ്ഞെടുപ്പ് കമ്മീഷന് പരാതി നൽകിയിരുന്നു. കോടതി ഉത്തരവിനെ തുടർന്ന് കമ്പംമേട്, ബോഡിമെട്ട് ചെക്ക്പോസ്റ്റുകളില്‍ കേന്ദ്ര സേനയെ വിന്യസിച്ച് കർശന നിരീക്ഷണമാണ് ഇപ്പോൾ നടന്നുകൊണ്ടിരിക്കുന്നത്.