കൊച്ചി:ഹൈക്കോടതി നിർദേശപ്രകാരം പാലാരിവട്ടം പാലത്തില്‍ ഭാര പരിശോധന നടത്താന്‍ സംസ്ഥാന സർക്കാർ തയ്യാറാകണമെന്ന് കേരള ഗവൺമെന്‍റ് കോൺട്രാക്‌ടേഴ്‌സ് അസോസിയേഷൻ പ്രസിഡന്‍റ് വർഗീസ് കണ്ണംമ്പള്ളി. നിർമാണ മേഖലയിലെ വിവിധ സംഘടനകൾ സംയുക്തമായി കൊച്ചിയിൽ സംഘടിപ്പിച്ച ജനകീയ സെമിനാറില്‍ പങ്കെടുക്കുകയായിരുന്നു അദ്ദേഹം.
പാലാരിവട്ടം പാലം സംബന്ധിച്ച വസ്‌തുതകൾ ചർച്ച ചെയ്യാനായിരുന്നു സെമിനാർ. പാലം അപകടാവസ്ഥയിലാണെങ്കില്‍ പൊളിച്ച് നീക്കണമെന്ന് അദ്ദേഹം പറഞ്ഞു. എന്നാൽ അത് തീരുമാനിക്കേണ്ടത് ഭാരപരിശോധന നടത്തിയാണ്. ഇതിനകം ഭാര പരിശോധ നടത്തി റിപ്പോർട്ട് കോടതിയിൽ കൊടുക്കാൻ കഴിയുമായിരുന്നു. എന്നാല്‍ അതിന് തയ്യാറാകാതെ പുനഃപരിശേധന ഹർജി നൽകുകയായിരുന്നു. ധൃതിപിടിച്ചുള്ള നിർമാണ പ്രവർത്തികളാണ് പാലത്തിന് മുകളിലെ ടാറിങ് ഇളകി പോകാന്‍ കാരണം. മുഖ്യമന്ത്രിയുടെ സൗകര്യത്തിനനുസരിച്ച് ഉദ്ഘാടനം നടത്താനാണ് ഇത്തരത്തിൽ ടാറിങ് നടത്തിയത്. എഞ്ചിനീയറിങ് രംഗത്തെ അവസാന വാക്ക് ഇ. ശ്രീധരനാണന്ന് പറയുന്നതിൽ അർഥമില്ല. സ്ട്രക്ച്ചറൽ എഞ്ചിനിയേഴ്‌സ് ആണ് ഇക്കാര്യത്തില്‍ അഭിപ്രായം പറയേണ്ടത്. ഇ. ശ്രീധരന് സമൂഹം നൽകുന്ന ബഹുമാനം അദ്ദേഹം മുതലെടുക്കുകയാണ്. പാലാരിവട്ടം പാലത്തിന്‍റെ ബലക്ഷയം കണ്ടുപിടിച്ചത് കരാറുകാരാണ്. കാരാറുകാരെ ആത്മഹത്യയിലേക്ക് തള്ളിവിടാനാണ് സർക്കാർ ശ്രമിക്കുന്നതെന്നും വർഗീസ് കണ്ണംമ്പള്ളി ആരോപിച്ചു.
