ഗതാഗതത്തിന് ഭീഷണിയായി കുട്ടമ്പുഴ പഞ്ചായത്തിലെ തകർന്ന കലുങ്ക്

കലുങ്കിനെ താങ്ങിനിർത്തിയിരുന്ന നടുഭാഗത്തെ വീതി കൂടിയ തൂണ് തകർന്ന് മുകളിലെ കോൺക്രിറ്റ് സ്ലാബിൽ നിന്നും പൂർണമായി അടർന്ന് മാറിയിരിക്കുകയാണ്. ഭാരവാഹനങ്ങൾ കടന്ന് പോകുമ്പോൾ ഏത് നിമിഷവും തകർന്ന് വീഴാവുന്ന സ്ഥിതിയിലാണ് കലുങ്ക്

എറണാകുളം: കുട്ടമ്പുഴ പഞ്ചായത്തിലെ പനം ചുവട് പണ്ടാരൻ സിറ്റി റോഡില്‍ അപകടക്കെണിയായി പാതി തകർന്ന കലുങ്ക്. പുനർനിർമിക്കാത്ത കലുങ്ക് ഗതാഗതത്തിനായി തുറന്നിട്ടിരിക്കുന്നത് അപകടത്തിനിടയാക്കുമെന്ന് നാട്ടുകാർ പറയുന്നു. കലുങ്കിനെ താങ്ങിനിർത്തിയിരുന്ന നടുഭാഗത്തെ വീതി കൂടിയ തൂണ് തകർന്ന് മുകളിലെ കോൺക്രീറ്റ് സ്ലാബിൽ നിന്നും പൂർണമായി അടർന്ന് മാറിയിരിക്കുകയാണ്. ഭാരവാഹനങ്ങൾ കടന്ന് പോകുമ്പോൾ ഏത് നിമിഷവും തകർന്ന് വീഴാവുന്ന സ്ഥിതിയിലാണ് കലുങ്ക്. നൂറുകണക്കിന് വാഹനങ്ങൾ ദിനം പ്രതി കടന്നു പോകുന്ന റോഡിലാണ് ദുരന്തം ക്ഷണിച്ചു വരുത്തും വിധം തകർന്ന കലുങ്ക് ഗതാഗതത്തിന് ഉപയോഗിക്കുന്നത്. കലുങ്ക് അപകടാവസ്ഥയിലായിട്ട് മാസങ്ങളായിട്ടും അധികൃതർ നിസംഗതയിലാണെന്ന് നാട്ടുകാർ ആരോപിക്കുന്നു.

പഞ്ചായത്തിന്‍റെ അധീനതയിലുള്ള കലുങ്ക് എത്രയും പെട്ടെന്ന് പുനർ നിർമിക്കണമെന്ന് നാട്ടുകാർ ആവശ്യപ്പെട്ടിട്ടും ഇതുവരെ യാതൊരു നടപടിയും ഉണ്ടായിട്ടില്ല. സ്‌കൂൾ വാഹനങ്ങൾ അടക്കമുള്ളവ ഈ വഴി കടന്നു പോകാറുണ്ട്. ദുരന്തം ക്ഷണിച്ചു വരുത്തുന്ന നടപടി തികച്ചും പ്രതിഷേധാർഹമാണെന്നും എത്രയും വേഗത്തിൽ കലുങ്ക് പുനർനിർമിക്കാനുള്ള നടപടികൾ സ്വീകരിച്ചില്ലെങ്കിൽ ശക്തമായ സമരപരിപാടികളുമായി മുന്നോട്ട് പോകുമെന്നുമാണ് നാട്ടുകാര്‍ വ്യക്തമാക്കുന്നത്.