ചുമതല മാർ ജോർജ് ആലഞ്ചേരിക്ക്: പ്രതിഷേധവുമായി അൽമായരുടെ സംഘടന

സിറോ മലബാർ സഭ മീഡിയ കമ്മീഷൻ ഇറക്കിയ പത്രക്കുറിപ്പ് തെറ്റിദ്ധാരണാജനകവും വിശ്വാസികളെ ആശങ്കപ്പെടുത്തുന്നതും ആണെന്ന് അല്‍മായർ.

കൊച്ചി: ആർച്ച് ബിഷപ് കർദിനാൾ മാർ ആലഞ്ചേരിക്ക് എറണാകുളം അങ്കമാലി അതിരൂപതയുടെ ചുമതല തിരിച്ചു നൽകിയതിനെതിരെ അൽമായരുടെ സംഘടന എഎംടി. അതിരൂപതക്ക് ഭീമമായ നഷ്ടമുണ്ടാക്കിയ കർദ്ദിനാളിനെ തുടരാനുവദിക്കുകയും സഹായമെത്രാൻമാരെ താല്കാലികമായി നീക്കുകയും ചെയ്തത് തികച്ചും ആശങ്കാജനകമാണ്. സീറോ മലബാർ സഭ മീഡിയ കമ്മീഷൻ ഇറക്കിയ പത്രക്കുറിപ്പ് തെറ്റിദ്ധാരണ ജനകവും വിശ്വാസികളെ ആശങ്കപ്പെടുത്തുന്നതാണെന്നും സംഘടന അറിയിച്ചു.
നടപടി മാർപാപ്പയുടെ ഭാഗത്തു നിന്ന് ഉണ്ടായതാണെന്ന് കരുതുന്നില്ല. ഓറിയെന്‍റൽ കോൺഗ്രിഗേഷൻ എടുത്ത തീരുമാനത്തെ മാർപാപ്പയുടെ നടപടിയായി മീഡിയ കമ്മീഷൻ അവതരിപ്പിച്ചതായി സംശയിക്കുന്നതായും എഎംടി പ്രസ്താവനയിൽ പറഞ്ഞു. വിഷയത്തിൽ എഎംടി ശക്തമായ പ്രതിഷേധ പരിപാടികൾ വരും ദിവസങ്ങളിൽ സംഘടിപ്പിക്കുമെന്നും ജനറൽ സെക്രടറി റിജു കാഞ്ഞൂക്കാരൻ അറിയിച്ചു.