പിറവം പള്ളിയില്‍ സുപ്രീം കോടതി വിധി നടപ്പായി

ഓർത്തഡോക്സ് വിഭാഗം വിശ്വാസികൾ പള്ളിയില്‍ 7.42ഓടെ പ്രഭാത പ്രാർഥന ആരംഭിച്ചു

എറണാകുളം: പിറവം വലിയ പള്ളിയില്‍ സുപ്രീം കോടതി വിധി നടപ്പായി. ഓർത്തഡോക്സ് വിഭാഗം വിശ്വാസികൾക്കായി സീല്‍ ചെയ്ത പള്ളിയുടെ പ്രധാന വാതില്‍ ആർ.ഡി.ഒ. തുറന്നു നല്‍കി. പള്ളിയുടെ താക്കോല്‍ കഴിഞ്ഞ ദിവസം കലക്ടർ ഹൈക്കേടതിയില്‍ ഏല്‍പിച്ചിരുന്നു. സമാധാനപരമായാണ് ഓർത്തഡോക്സ് വിഭാഗം വിശ്വാസികൾ പള്ളിക്കകത്തേക്ക് പ്രവേശിച്ചത്. വൈദികന്‍ സ്കറിയ വട്ടക്കാട്ടിലിന്‍റെ നേതൃത്വത്തിലാണ് ഓർത്തഡോക്സ് വിഭാഗം വിശ്വാസികൾ പള്ളിക്കകത്തേക്ക് പ്രവേശിച്ചത്. ഓർത്തഡോക്സ് വിഭാഗം ഇടവക വിശ്വാസികൾ മാത്രമാണ് പള്ളിയില്‍ പ്രവേശിക്കാന്‍ അനുവാദമുണ്ടായിരുന്നത്.

7.42ഓടെ പള്ളിയില്‍ പ്രഭാത പ്രാർഥന ആരംഭിച്ചു. തുർന്ന് കുർബാനയും നടന്നു. നിരവധി വിശ്വാസികളാണ് പ്രാർഥനാ ചടങ്ങുകളില്‍ പങ്കെടുക്കാന്‍ എത്തിയത്. സുപ്രീം കോടതി വിധി നടപ്പായതില്‍ ഏറെ സന്തോഷിക്കുന്നതായി ഓർത്തഡോക്സ് വിഭാഗം വിശ്വാസികൾ മാധ്യമങ്ങളോട് പ്രതികരിച്ചു. അതേസമയം വിധി നടപ്പാക്കുന്നതില്‍ പ്രതിഷേധിച്ച് യാക്കോബായ വിഭാഗം പള്ളിക്ക് പുറത്ത് റോഡില്‍ താല്‍ക്കാലിക അൾത്താരയ്ക്ക് മുന്നില്‍ കുർബാന നടത്തി പ്രതിഷേധിച്ചു. എന്നാല്‍ കോടതി വിധിയുടെ പശ്ചാത്തലത്തില്‍ പള്ളക്ക് സമീപം യാക്കോബായ വിഭാഗത്തിന്‍റെ പ്രതിഷേധമുണ്ടായിരുന്നില്ല. പ്രതിഷേധിക്കുന്നവരെ അറസ്റ്റ് ചെയ്ത് നീക്കണമെന്ന് കഴിഞ്ഞ ദിവസം ഹൈക്കോടതി പറഞ്ഞിരുന്നു. വിധി നടപ്പാക്കുന്ന പശ്ചാത്തലത്തില്‍ പള്ളിക്ക് സമീപം പൊലീസ് ശക്തമായ കാവലാണ് ഏർപെടുത്തിയത്.