കൊച്ചിയിലെ മുതിർന്ന മുസ്ലിംലീഗ് നേതാക്കൾ സി.പി.എമ്മിലേക്ക്

നിരവധി നേതാക്കൾ തങ്ങളുടെ തീരുമാനത്തിന് പിന്തുണ അറിയിച്ചിട്ടുണ്ട്. മതേതരത്വം പുറത്ത് പറയുകയും ലീഗ് പാർട്ടിയിൽ അത് ഇല്ലാതാവുകയുമാണ് ചെയ്യുന്നതെന്നും കൊച്ചി കോർപ്പറേഷൻ മുൻ കൗൺസിലർ പി.എം. ഹാരിസ്.

എറണാകുളം: കൊച്ചിയിലെ മുതിർന്ന മുസ്ലിംലീഗ് നേതാക്കൾ പാർട്ടി വിട്ടു. ലീഗ് ദേശീയ സമിതി അംഗവും കൊച്ചി കോർപ്പറേഷൻ മുൻ കൗൺസിലറുമായ പി.എം. ഹാരിസ്, ദേശീയ സമിതി അംഗം രഘുനാഥ് പനവേലി ഉൾപ്പടെ എട്ട് പേരാണ് രാജിവെച്ചത്. പാർട്ടിയുടെ വർഗ്ഗീയ, വിഭാഗീയ നിലപാടിൽ പ്രതിഷേധിച്ചാണ് തീരുമാനമെന്ന് ഇവർ വാർത്താ സമ്മേളനത്തിൽ പറഞ്ഞു.

സി.പി.ഐ എമ്മിൽ ചേർന്ന് പ്രവർത്തിക്കാൻ തീരുമാനിച്ചതായും രാജിവെച്ച ലീഗ് നേതാക്കൾ അറിയിച്ചു. രാജിക്കത്ത് പാണക്കാട് തങ്ങൾക്കയച്ചു. ഇതൊരു തുടക്കം മാത്രമാണെന്നും കൂടുതൽ പേർ ലീഗ് വിടുമെന്നും പി.എം ഹാരിസ് പറഞ്ഞു. നിരവധി നേതാക്കൾ തങ്ങളുടെ തീരുമാനത്തിന് പിന്തുണ അറിയിച്ചിട്ടുണ്ട്. മതേതരത്വം പുറത്ത് പറയുകയും ലീഗ് പാർട്ടിയിൽ അത് ഇല്ലാതാവുകയുമാണ് ചെയ്യുന്നത്.

കൂടുതല്‍ വായനക്ക്:- കുഞ്ഞാലിക്കുട്ടി യുഗത്തിന് അന്ത്യമാവുമോ? കാത്തിരിന്ന് കാണണം!

പല വിഷയങ്ങളിലും തിരുത്തൽ ആവശ്യപ്പെട്ടുവെങ്കിലും പാർടി നേതൃത്വം തയ്യാറല്ല. മുസ്ലിം ജനവിഭാഗത്തിന്റെ താല്പര്യം സംരക്ഷിക്കുകയാണെന്ന് അവകാശപ്പെട്ട് അവരെ വഞ്ചിക്കുകയാണ്. ഒരു തരത്തിലും യോജിച്ച് മുന്നോട്ട് പോകാൻ കഴിയില്ലന്ന് മനസിലാക്കിയാണ് പാർടി വിട്ടത്. ഉപാധികൾ ഒന്നുമില്ലാതെയാണ് സി.പി.ഐഎമ്മിൽ ചേരുന്നത്. പ്രതിസന്ധി ഘട്ടങ്ങളിൽ മാതൃകാപരമായാണ് സംസ്ഥാന സർക്കാർ പ്രവർത്തിച്ചതെന്നും അദ്ദേഹം പറഞ്ഞു.