കരിപ്പൂർ സ്വർണക്കടത്ത് ; സജേഷിനെ ചോദ്യം ചെയ്‌ത് വിട്ടയച്ച് കസ്റ്റംസ്

സ്വർണക്കടത്തുമായി തനിക്ക് യാതൊരു ബന്ധവുമില്ലെന്നും അർജുൻ ആയങ്കിയുടെ ഇടപാടുകളെക്കുറിച്ച് അറിയില്ലെന്നുമാണ് സജേഷിന്‍റെ വാദം.

എറണാകുളം : കരിപ്പൂർ സ്വർണക്കടത്ത് കേസിൽ ഡിവൈഎഫ്ഐ മുൻ പ്രാദേശിക നേതാവ് സി. സജേഷിനെ കസ്റ്റംസ് ചോദ്യം ചെയ്‌ത് വിട്ടയച്ചു. കൊച്ചിയിലെ കസ്റ്റംസ് പ്രിവന്‍റീവ് വിഭാഗം കാര്യാലയത്തിൽ ഏഴ് മണിക്കൂറാണ് ഇയാളെ ചോദ്യം ചെയ്‌തത്. മൊഴി പരിശോധിച്ച ശേഷം വീണ്ടും ചോദ്യം ചെയ്യണമോ എന്ന കാര്യത്തിൽ കസ്റ്റംസ് സംഘം തീരുമാനമെടുക്കും.

സ്വർണക്കടത്തുമായി ബന്ധമില്ലെന്നും അർജുൻ ആയങ്കിയുടെ ഇടപാടുകളെ കുറിച്ച് അറിയില്ലന്നുമാണ് സജേഷ് കസ്റ്റംസിന് മൊഴി നൽകിയത്. അർജുന് വാഹന ലോൺ ലഭിക്കാത്തതിനെ തുടർന്നാണ് തന്‍റെ പേരിൽ വാഹനമെടുത്തത്.

ഇത് സ്വന്തം പേരിലേക്ക് മാറ്റാൻ അർജുൻ ആയങ്കിയോട് ആവശ്യപ്പെട്ടിരുന്നു. എന്നാൽ മാറ്റാൻ അര്‍ജുന്‍ തയ്യാറായില്ലെന്നും സജേഷ് മൊഴി നൽകി.

മുഖ്യപ്രതി അർജുൻ ആയങ്കിയുടെ ബിനാമിയാണ് സജേഷ് എന്നാണ് കസ്റ്റംസിന്‍റെ ആരോപണം. ഇതിന്‍റെ അടിസ്ഥാനത്തിലാണ് സജേഷിനെ നോട്ടിസ് നൽകി വിളിച്ച് വരുത്തി ചോദ്യം ചെയ്‌തത്.

രാവിലെ പതിനൊന്ന് മണിക്ക് ഹാജരാകാൻ കസ്റ്റംസ് ആവശ്യപ്പെട്ട സജേഷ് മാധ്യമങ്ങളുടെ ശ്രദ്ധയിൽ പെടാതിരിക്കാൻ രാവിലെ ഒമ്പത് മണിക്ക് മുമ്പ് തന്നെ കസ്റ്റംസ് ഓഫീസിലെത്തിയിരുന്നു. ചോദ്യം ചെയ്യലിന് ശേഷം കസ്റ്റംസ് ഓഫീസിൽ നിന്ന് മടങ്ങിയപ്പോഴും മാധ്യമങ്ങളെ കബളിപ്പിച്ച് ഇരുചക്ര വാഹനത്തിലാണ് മടങ്ങിയത്.

ചോദ്യം ചെയ്യൽ നീണ്ടത് ഏഴ് മണിക്കൂർ

സ്വർണക്കടത്തിൽ സജേഷിന് ബന്ധമുണ്ടോയെന്നാണ് കസ്റ്റംസ് പരിശോധിക്കുന്നത്. ചോദ്യം ചെയ്യലിൽ ഇതുമായി ബന്ധപ്പെട്ട് വ്യക്തത വരുത്താൻ കസ്റ്റംസിന് കഴിഞ്ഞിട്ടില്ല.

പതിനൊന്ന് മണിക്ക് ആരംഭിച്ച സജേഷിന്‍റെ ചോദ്യം ചെയ്യൽ അവസാനിച്ചത് വൈകുന്നേരം ആറ് മണിയോടെയാണ്. നിലവിൽ കസ്റ്റംസ് കസ്റ്റഡിയിലുള്ള മുഹമ്മദ് ഷഫീഖ്, അർജുൻ ആയങ്കി എന്നിവർക്ക് ഒപ്പമിരുത്തിയും സജേഷിനെ കസ്റ്റംസ് ചോദ്യം ചെയ്‌തു.

പ്രതികൾ നൽകുന്നത് പരസ്‌പര വിരുദ്ധ മൊഴികൾ

എന്നാൽ, അർജുൻ ആയങ്കിയും, കാരിയറായ ഷഫീഖും നൽകുന്നത് വ്യത്യസ്ഥ മൊഴികളാണ്. സുഹൃത്ത് റമീസിന്‍റെ, ഷഫീഖ് കടം വാങ്ങിയ പണം തിരിച്ച് വാങ്ങാനാണ് വിമാനത്താവളത്തിൽ എത്തിയതെന്ന മൊഴി ആവർത്തിക്കുകയാണ് അർജുൻ.

അതേസമയം, കരിപ്പൂരിൽ കസ്റ്റംസ് പിടിച്ചെടുത്ത സ്വർണം അർജുന് നൽകാനാണ് എത്തിച്ചതെന്ന മൊഴിയിൽ ഉറച്ചുനിൽക്കുകയാണ് ഷഫീഖ്. ഇരുവരെയും നാളെ രാവിലെ മുതൽ വീണ്ടും കസ്റ്റംസ് ചോദ്യം ചെയ്യും.