സൈനിക വേഷത്തിൽ നഴ്‌സസ് ദിനം ആഘോഷിച്ച് രാജഗിരിയിലെ മാലാഖമാർ

കൊവിഡ് പോരാളികൾ എന്ന നിലയിൽ നഴ്‌സുമാർ സൈനികർക്ക് തുല്യമായ സേവനം ആണ് സമൂഹത്തിന് നൽകുന്നത് എന്ന ആശയം പ്രതീകാത്മകമായി അവതരിപ്പിക്കുകയാണ് ആശുപത്രി അധികൃതർ ഈ ദിവസം

എറണാകുളം: ലോക നഴ്‌സസ് ദിനത്തോടനുബന്ധിച്ച് ആലുവ രാജ​ഗിരി ആശുപത്രിയിലെ നഴ്‌സുമാർ ഇന്ന് എത്തിയത് സൈനിക വേഷത്തിൽ. അതിർത്തിയിൽ കാവൽ നിൽക്കുന്ന പടയാളികളെ പോലെയാണ് രാജഗിരിയിലെ മാലാഖമാർ രോ​ഗികളെ പരിചരിക്കാൻ എത്തിയത്. കൊവിഡ് പോരാളികൾ എന്ന നിലയിൽ നഴ്‌സുമാർ സൈനികർക്ക് തുല്യമായ സേവനം ആണ് സമൂഹത്തിന് നൽകുന്നത് എന്ന ആശയം പ്രതീകാത്മകമായി അവതരിപ്പിക്കുകയാണ് ആശുപത്രി അധികൃതർ ഈ ദിവസം.

കൊവിഡിനെ ചെറുത്തുനിൽക്കുന്ന ഒരു പോരാളിയെന്ന നിലയിൽ അഭിമാനിക്കുന്നവരാണ് ഇവിടുത്തെ ഓരോ നഴ്‌സുമാരും. സ്വന്തം ജീവൻ പോലും പണയം വെച്ച് ഓരോ ​രോ​ഗിയേയും സ്വന്തം കുടുംബാം​ഗത്തെ പോലെ കണ്ട് ജീവിതത്തിലേക്ക് കൈ പിടിച്ച് കൊണ്ടുവരുവാൻ യുദ്ധസമാനമായ പോരാട്ടം നടത്തുന്നവർക്ക് ഏറ്റവും അധികം ചേരുന്നതും ഈ സൈനിക വേഷം തന്നെയാണ്.