കോടതി നിലനിൽക്കുന്നിടത്തോളം കാലം കെ.എസ്.ആർ.ടി.സി അടച്ചു പൂട്ടാനാകില്ല: ഹൈക്കോടതി

കെ.എസ്.ആർ.ടി.സി സ്റ്റാന്‍റുകളിലെ ശൗചാലയങ്ങളുടെ അവസ്ഥ ഭയാനകം. കോര്‍പ്പറേഷനെ പുനരുജ്ജീവിപ്പിക്കാനായി ഒന്നിക്കണമെന്ന് തൊഴിലാളികളോട് ഹൈക്കോടതി. ശമ്പളം ഉറപ്പാക്കണമെന്ന് ആവശ്യപ്പെട്ടുള്ള ഹര്‍ജി ഓഗസ്റ്റ് രണ്ടിന് വീണ്ടും പരിഗണിക്കും

എറണാകുളം:കോടതി നിലനിൽക്കുന്നിടത്തോളം കാലം കെ.എസ്.ആർ.ടി.സി അടച്ചു പൂട്ടാനാകില്ലെന്ന് ഹൈക്കോടതി. കെ.എസ്.ആർ.ടി.സി ആസ്ഥാന മന്ദിരത്തിന് മുന്നിലെ സമരം അവസാനിപ്പിച്ച തൊഴിലാളി യൂണിയനുകൾക്ക് കോടതിയുടെ അഭിനന്ദനം അറിയിച്ചു. കെ.എസ്.ആർ.ടി.സി ബസ് സ്റ്റാന്‍റുകളിലെ അടിസ്ഥാന സൗകര്യമില്ലായ്‌മയിൽ ഹൈക്കോടതി അതൃപ്‌തി പ്രകടിപ്പിച്ചു.

ശമ്പളം ഉറപ്പാക്കണമെന്ന് ആവശ്യപ്പെട്ട് കെ.എസ്.ആർ.ടി.സി ജീവനക്കാർ നൽകിയ ഹർജി പരിഗണിക്കവെയാണ് കോർപ്പറേഷൻ നിലനിർത്തുന്നത് സംബന്ധിച്ച് ഹൈക്കോടതി പരാമർശം ഉണ്ടായത്. കെ.എസ്.ആർ.ടിസിയെ പുനരുജ്ജീവിപ്പിക്കാൻ ഒത്തൊരുമിച്ച് ശ്രമിക്കണമെന്നും തൊഴിലാളി സംഘടനകളോട് ഹൈക്കോടതി ആവശ്യപ്പെട്ടു. അതേസമയം കെ.എസ്.ആർ.ടി.സി സ്റ്റാന്‍റുകളിലെ അടിസ്ഥാന സൗകര്യമില്ലായ്‌മ കോടതിയിൽ വിമർശനത്തിന് വിധേയമായി.

ബസ്‌ സ്റ്റാന്‍റുകളിലെ ശൗചാലയങ്ങളുടെ അവസ്ഥ ഭയാനകമെന്നായിരുന്നു ജസ്റ്റിസ് ദേവൻ രാമചന്ദ്രന്‍റെ വിമർശനം. എന്നാൽ അടിസ്ഥാന സൗകര്യം അടക്കമുള്ള വിഷയങ്ങളിൽ ഉടൻ ഇടപെടല്‍ ഉണ്ടാകുമെന്ന് കെ.എസ്.ആർ.ടി.സിയുടെ അഭിഭാഷകൻ ദീപു തങ്കൻ കോടതിയിൽ വ്യക്തമാക്കി.

എല്ലാ മാസവും അഞ്ചാം തിയതിക്കകം കെ.എസ്.ആർ.ടി.സി ജീവനക്കാർക്ക് ശമ്പളം നൽകാൻ നടപടി ഉണ്ടാകണമെന്ന് ഹൈക്കോടതി നേരത്തെ നിർദേശിച്ചിരുന്നു. ഇക്കാര്യത്തിൽ ജൂലൈ 31-നകം സർക്കാർ കോടതി മുൻപാകെ റിപ്പോർട്ട് സമർപ്പിക്കും. ശമ്പളം ഉറപ്പാക്കണമെന്ന് ആവശ്യപ്പെട്ട് ജീവനക്കാർ നൽകിയ ഹർജി കോടതി ഓഗസ്റ്റ് രണ്ടിന് പരിഗണിക്കുകയും ചെയ്യും.