ഓക്‌സിജൻ വിതരണത്തിന് സ്വകാര്യ ആശുപത്രികൾക്ക് മാർഗനിർദ്ദേശങ്ങൾ

ജില്ലാ ദുരന്ത നിവാരണ അതോറിറ്റിയാണ് എറണാകുളത്തെ സ്വകാര്യ ആശുപത്രികൾക്ക് മാർഗ നിർദേശങ്ങൾ നൽകിയത്.

എറണാകുളം: ജില്ലയിലെ കൃത്യമായ ഓക്‌സിജൻ വിതരണത്തിനായി സ്വകാര്യ ആശുപത്രികൾ പാലിക്കേണ്ട മാർഗ നിർദേശങ്ങൾ പുറത്തിറക്കി. ജില്ലാ ദുരന്ത നിവാരണ അതോറിറ്റിയാണ് മാർഗ നിർദേശങ്ങൾ തയ്യാറാക്കിയത്.

നിർദേശങ്ങൾ

• ഓക്‌സിജൻ വിതരണവും ഉപയോഗവുമായി ബന്ധപ്പെട്ട ഉപകരണങ്ങൾ ദിവസവും പരിശോധിക്കുകയും നിരീക്ഷിക്കുകയും ചെയ്യുക
• ഓക്‌സിജൻ പാഴാക്കാതെ കൃത്യമായി ഉപയോഗിക്കുക, ചോർച്ചയിലൂടെയോ മറ്റു തരത്തിലോ പാഴാകാതെ ശ്രദ്ധിക്കുക.
• അടിയന്തര പ്രാധാന്യമില്ലാത്ത ഓപറേഷനുകൾ പരമാവധി ഒഴിവാക്കുക, ഇത്തരം ഓപറേഷനുകൾ നടക്കുന്നുവെങ്കിൽ അതിൻ്റെ വിവരങ്ങൾ മുൻകൂട്ടി ഓക്‌സിജൻ വാർ റൂമിൽ അറിയിക്കുക.

സ്വകാര്യ ആശുപത്രികളിൽ റാപിഡ് സേഫ്റ്റി ഓഡിറ്റ് ടീമിൻ്റെ പരിശോധനയുണ്ടാകും. അതിനാൽ സ്വകാര്യ ആശുപത്രികൾ കൃത്യമായി മാനദണ്ഡങ്ങൾ പാലിക്കണം. സംഘത്തിൻ്റെ പരിശോധനകളുമായി ആശുപത്രികൾ സഹകരിക്കുകയും ഒരു നോഡൽ ഓഫീസറെ ഇതിനായി നിയമിക്കുകയും വേണമെന്നും അധികൃതർ അറിയിച്ചു.