ഹെറോയിനുമായി മൂന്ന് അതിഥി തൊഴിലാളികള്‍ പൊലീസ് പിടിയില്‍

അസം സ്വദേശികളായ ഹൈറുൾ ഇസ്ലാം (31), അഹമ്മദ് അലി (35), മുസിദുൽ ഇസ്ലാം (26) എന്നിവരാണ് പിടിയിലായത്. രഹസ്യ വിവരത്തെ തുടര്‍ന്ന് പൊലീസ് നടത്തിയ പരിശോധനയില്‍ ആയിരുന്നു അറസ്റ്റ്.

എറണാകുളം:ഹെറോയിൻ വിൽപ്പന നടത്തിവന്ന അതിഥി തൊഴിലാളികളായ മൂന്നംഗ സംഘത്തെ പിടികൂടി. ചെമ്പറക്കി കൈപ്പൂരിക്കര ഭാഗത്തെ വാടക വീട്ടിൽ താമസിക്കുന്ന അസം സ്വദേശികളായ ഹൈറുൾ ഇസ്ലാം (31), അഹമ്മദ് അലി (35), മുസിദുൽ ഇസ്ലാം (26) എന്നിവരെയാണ് തടിയിട്ടപറമ്പ് പൊലീസ് പിടികൂടിയത്.

അസമിൽ നിന്നും ഹെറോയിൻ എത്തിച്ചാണ് ഇവർ ഇവിടെ വിതരണം ചെയ്‌തിരുന്നത്. ചെറിയ ഡപ്പിയിലാക്കിയായിരുന്നു വില്‍പന. ബൈക്കിൽ സഞ്ചരിക്കവെയാണ് പ്രതികൾ പിടിയിലായത്. തുടർന്ന് ഇവർ താമസിച്ചിരുന്ന വാടക വീട് പരിശോധന നടത്തുകയായിരുന്നു. പിവിസി പൈപ്പിനുള്ളിൽ പാക്കറ്റുകളായി സോപ്പുപെട്ടിയിൽ വച്ച് അടച്ച് സൂക്ഷിച്ചിരിക്കുകയായിരുന്നു.

ഈർപ്പമടിക്കാതിരിക്കാൻ കുട്ടികളുടെ ഡയപ്പറിനുള്ളില്‍ ആയിരുന്നു സൂക്ഷിച്ചിരുന്നത്. 153 ഗ്രാം ഹെറോയിനാണ് കണ്ടെടുത്തത്. ചെറിയ ഡെപ്പികളില്‍ ആക്കിയ ഹെറോയിന് 600 രൂപ മുതല്‍ 1000 രൂപയ്‌ക്ക്‌ വരെയാണ് വിൽപ്പന നടത്തുന്നത്.

എറണാകുളം ജില്ല പൊലീസ് മേധാവി വിവേക് കുമാറിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ പരിശോധനയിലാണ് ഹെറോയിൻ കണ്ടെത്തിയത്. പെരുമ്പാവൂർ എ.എസ്.പി അനൂജ് പലിവാലിന്‍റെ നേതൃത്വത്തിലുള്ള പൊലീസ് സംഘമാണ് പ്രതികളെ പിടികൂടിയത്.