എറണാകുളം:ആനക്കൊമ്പ് കേസില്‍ നടന്‍ മോഹന്‍ലാല്‍ ഉള്‍പ്പെടെയുള്ള പ്രതികള്‍ കോടതിയില്‍ നേരിട്ട് ഹാജരാകണമെന്ന് കോടതി. നവംബര്‍ 3ന് ഹാജരാകാനാണ് പെരുമ്പാവൂർ മജിസ്ട്രേറ്റ് കോടതിയുടെ ഉത്തരവ്. കേസ് പിൻവലിക്കാനുള്ള സർക്കാരിന്‍റെ അപേക്ഷ കോടതി തള്ളി. ആവശ്യം പെതുതാത്‌പര്യത്തിന് വിരുദ്ധമാണെന്ന് കോടതി ചൂണ്ടിക്കാട്ടി.
കേസ് പിന്‍വലിക്കണമെന്ന ആവശ്യം കോടതി നിരാകരിക്കുന്നത് ഇത് രണ്ടാം തവണയാണ്. നേരത്തെ സമാനമായ രീതിയിൽ സർക്കാർ സമർപ്പിച്ച ഹർജി മജിസ്ട്രേറ്റ് കോടതി തളളിയിരുന്നു. ഇതിനെതിരെ മോഹൻലാൽ ഹൈക്കോടതിയെ സമീപിച്ചു. എന്നാൽ മജിസ്ട്രേറ്റ് കോടതി നടപടിക്കെതിരെ പുനഃപരിശോധന ഹര്‍ജി നൽകാൻ പ്രതികൾക്ക് അധികാരമില്ലെന്ന് ഹൈക്കോടതി വ്യക്തമാക്കി.
തുടർന്ന് കേസ് പിൻവലിക്കണമെന്ന സർക്കാരിന്‍റെ ഹര്‍ജി വീണ്ടും പരിഗണിക്കാൻ മജിസ്ട്രേറ്റ് കോടതിക്ക് ഹൈക്കോടതി നിർദേശം നൽകുകയായിരുന്നു. പെരുമ്പാവൂർ കോടതി നടപടിക്കെതിരായ സർക്കാർ ഹര്‍ജി തീർപ്പാക്കിയാണ് കോടതി ഇത്തരമൊരു നിർദേശം നൽകിയത്. ഇതോടെയാണ് കേസ് വീണ്ടും പെരുമ്പാവൂർ മജിസ്ട്രേറ്റ് കോടതി പരിഗണിക്കുകയും കേസ് റദ്ദാക്കണമെന്ന സർക്കാര്‍ ആവശ്യം തള്ളുകയും ചെയ്‌തത്.
മോഹന്‍ലാലിനെതിരെയുള്ള ആനക്കൊമ്പ് കേസ്:2011 ഡിസംബര്‍ 21നാണ് കേസിനാസ്‌പദമായ സംഭവം. തേവരയിലെ മോഹന്‍ലാലിന്‍റെ വീട്ടില്‍ ആദായ നികുതി വകുപ്പ് നടത്തിയ പരിശോധനയിലാണ് ആനക്കൊമ്പുകള്‍ കണ്ടെത്തിയത്. രണ്ട് ജോടി ആനക്കൊമ്പുകളാണ് വീട്ടില്‍ നിന്നും സംഘം പിടികൂടിയത്. സംഭവത്തിന് പിന്നാലെ ആനക്കൊമ്പുകള്‍ കൈവശം വച്ചതിന് നടന്‍ മോഹന്‍ലാലിനെതിരെ വനംവകുപ്പ് കേസെടുത്തു.