എറണാകുളം:തിരുവനന്തപുരം മതവിദ്വേഷ പ്രസംഗ കേസില്‍ അറസ്‌റ്റിലായ പി സി.ജോര്‍ജ് നല്‍കിയ ജാമ്യാപേക്ഷ ഇന്ന് (26 മെയ്‌ 2022) രാവിലെ ഹൈക്കോടതി പരിഗണിക്കും. ജസ്‌റ്റിസ് പി.ഗോപിനാഥന്‍ അധ്യക്ഷനായ ബഞ്ചാണ് വിഷയം പരിഗണിക്കുന്നത്. ജാമ്യം റദ്ദാക്കിയ തിരുവനന്തപുരം മജിസ്‌ട്രേറ്റ് കോടതി ഉത്തരവിനെതിരെ ഇന്നലെ രാത്രി ഓണ്‍ലൈനായാണ് പി സി.ജോര്‍ജ് ഹര്‍ജി സമര്‍പ്പിച്ചത്.
രാത്രി തന്നെ കേസ് അടിയന്തരമായി പരിഗണിക്കണമെന്ന പിസി ജോര്‍ജിന്‍റെ അഭിഭാഷകരുടെ ആവശ്യം കോടതി തള്ളിയിരുന്നു. തനിക്ക് വെര്‍ടിഗോ അസുഖമുണ്ടെന്നും ശ്വസനോപകരണങ്ങളുടെ സഹായത്തോടെയാണ് മുന്നോട്ടു പോകുന്നതെന്നുമാണ് പി സി.ജോര്‍ജ് ഹര്‍ജിയില്‍ പറഞ്ഞിരിക്കുന്നത്.