എറണാകുളം : പാലാരിവട്ടം മേൽപ്പാലം അഴിമതിക്കേസിൽ വിജിലൻസ് അറസ്‌റ്റ് ചെയ്‌ത മുൻ പൊതുമരാമത്ത് വകുപ്പ് സെക്രട്ടറി ടി.ഒ സൂരജ് ഉൾപ്പെടെ നാലുപേരെ മൂവാറ്റുപുഴ വിജിലൻസ് കോടതി റിമാന്‍ഡ് ചെയ്തു. സൂരജിന് പുറമേ കിറ്റ്‌കോ ജനറൽ മനേജർ ബെന്നി പോൾ, ആർ.ഡി.എക്സ് എംഡി സുമിത് ഗോയൽ, ആർ.ബി.ഡി.സി മുൻ എ.ജി.എം തങ്കച്ചൻ എന്നിവരെയാണ് റിമാന്‍ഡ് ചെയ്‌ത് മൂവാറ്റുപുഴ സബ് ജയിലിലേക്ക് മാറ്റിയത്.
ഇതിനിടെ തന്നെ കേസിൽ കുടുക്കിയതാണെന്നും താൻ നിരപരാധിയാണെന്നും ടി.ഒ.സൂരജ് മാധ്യമപ്രവർത്തകരോടു പറഞ്ഞു. ആരാണ് ഇതിന്‍റെ പിന്നിലെന്നു നിങ്ങൾ അന്വേഷിക്കണമെന്നും പാലത്തിന്‍റെ പൈലിങ് ജോലി ആരംഭിക്കുന്ന സമയത്ത് ഞാൻ സ്ഥലത്ത് ഇല്ലായിരുന്നെന്നും ടി.ഒ സൂരജ് പറഞ്ഞു.
മന്ത്രിസഭാ തീരുമാനപ്രകാരം ഉത്തരവിറക്കുകമാത്രമാണ് താൻ ചെയ്തതെന്ന് നേരത്തെ സൂരജ് വ്യക്തമാക്കിയിരുന്നു.
പാലം നിർമ്മാണ വേളയിൽ പൊതുമരാമത്ത് മന്ത്രിയായിരുന്ന വി.കെ.ഇബ്രാഹിം കുഞ്ഞിനെയും, ആർ.ബി.ഡി.സി ചെയർമാനായ മുഹമ്മദ് ഹനീഷിനെയും നേരത്തെ ചോദ്യം ചെയ്‌ത് വിട്ടയച്ചിരുന്നു. പ്രതി പട്ടികയിൽ ഉൾപ്പെടുത്തേണ്ട പതിനേഴ് പേരുടെ ലിസ്റ്റാണ് വിജിലൻസ് തയ്യാറാക്കിയത്. പാലം നിർമ്മാണ ക്രമക്കേടിൽ അന്വേഷണം തുരുമെന്ന് കൊച്ചി യൂണിറ്റ് വിജിലൻസ് ഡി.വൈ.എസ്.പി അശോക് കുമാർ പറഞ്ഞു.