എറണാകുളം:പുരാവസ്‌തു തട്ടിപ്പ് കേസിലെ പ്രതി മോൻസണ്‍ മാവുങ്കലിനെ ആശുപത്രിയിൽ പ്രവേശിപ്പിച്ചു. രക്തസമ്മർദ്ദം ഉയർന്നതിനെ തുടർന്നാണ് മോൻസണെ എറണാകുളം ജനറൽ ആശുപത്രിയിൽ നിരീക്ഷണത്തിലാക്കിയത്. കോടതിയിൽ ഹാജരാക്കുന്നതിന് മുന്നോടിയായി വൈദ്യ പരിശോധനയ്‌ക്കെത്തിയപ്പോഴാണ് പ്രതിക്ക് രക്തസമ്മർദ്ദം ഉയർന്നത്.
ആരോഗ്യസ്ഥിതി മെച്ചപ്പെട്ട ശേഷം കോടതിയിൽ ഹാജരാക്കും. മോൻസൺ മാവുങ്കലിന്‍റെ ജാമ്യാപേക്ഷയിലും, ക്രൈം ബ്രാഞ്ചിന്‍റെ കസ്റ്റഡി അപേക്ഷയിലും എറണാകുളം എ.സി.ജെ.എം കോടതി വിധി പറയും. മോൻസൺ മാവുങ്കലിന് ഉന്നത രാഷ്‌ട്രീയ, സാമൂഹ്യ, ഉദ്യോഗസ്ഥ ബന്ധങ്ങളുണ്ടെന്നാണ് ക്രൈംബ്രാഞ്ച് അന്വേഷണ സംഘം കോടതിയെ അറിയിച്ചിട്ടുള്ളത്. പല ഉന്നതർക്കുമൊപ്പം നിൽക്കുന്ന ചിത്രങ്ങളും ഉന്നത വ്യക്തികളുമായി ബിസിനസിനെക്കുറിച്ചു നടത്തിയ സംഭാഷണങ്ങളുടെ ശബ്ദരേഖയും ഇയാൾ തട്ടിപ്പു നടത്താൻ ഉപയോഗിച്ചു.