മധ്യവയസ്ക്കനെ മരിച്ച നിലയിൽ കണ്ടെത്തി

മൃതദേഹത്തിന് സമീപം മൽപിടുത്തത്തിന്‍റെ ലക്ഷണവും കണ്ടെത്തിയിട്ടുണ്ട്

കൊച്ചി: പെരുമ്പാവൂരിൽ മധ്യവയസ്‌കനെ മരിച്ച നിലയിൽ കണ്ടെത്തി. വളയൻചിറങ്ങര സ്വദേശി വിജയനെയാണ് ഞായറാഴ്‌ച പുലർച്ചെ ആറരയോടെ വീടിന് സമീപമുളള കള്ള് ഷാപ്പിനടുത്ത് മരിച്ച നിലയിൽ കണ്ടെത്തിയത്. മുഖത്തും നെറ്റിയിലും മുറിവേറ്റ പാടുണ്ട്. കല്ലുകൊണ്ട് മർദ്ദനമേറ്റ നിലയിലായിരുന്നു മൃതദേഹം. മൃതദേഹം കിടന്നിരുന്നതിന് സമീപം മൽപിടുത്തത്തിന്‍റെ ലക്ഷണവും കണ്ടെത്തി. കൊലപാതകമാണെന്നാണ് പ്രാഥമിക നിഗമനം. പോസ്റ്റ്‌മോര്‍ട്ടം റിപ്പോർട്ട് കിട്ടിയതിന് ശേഷമേ മരണകാരണം വ്യക്തമാകൂവെന്ന് പൊലീസ് പറഞ്ഞു. വീട്ടുകാരുമായി പിരിഞ്ഞ വിജയൻ വർഷങ്ങളായി ഒറ്റക്കായിരുന്നു താമസിച്ചിരുന്നത്.