'പിന്നില്‍ നടന്ന് ശല്യം ചെയ്യുന്നു' ; പാര്‍വതി തിരുവോത്തിന്‍റെ പരാതിയില്‍ യുവാവ് അറസ്റ്റില്‍

നിരന്തരം പിന്തുടർന്ന് ശല്യം ചെയ്തതിനെ തുടർന്ന് നടി മരട് പൊലീസിൽ നൽകിയ പരാതിയുടെ അടിസ്ഥാനത്തിലാണ് നടപടി

എറണാകുളം : നടി പാര്‍വതി തിരുവോത്തിനെ ശല്യം ചെയ്ത യുവാവ് കൊച്ചിയിൽ അറസ്റ്റിൽ. കൊല്ലം സ്വദേശി അഫ്‌സലാണ് പിടിയിലായത്. യുവാവ് പിന്തുടർന്ന് ശല്യം ചെയ്യുന്നുവെന്ന് നടി മരട് പൊലീസിൽ നൽകിയ പരാതിയുടെ അടിസ്ഥാനത്തിലാണ് നടപടി. 2016ൽ ബംഗളൂരുവില്‍ സുഹൃത്ത് സംഘടിപ്പിച്ച പരിപാടിയിൽ പങ്കെടുത്തപ്പോൾ ഇയാൾ നടിയെ പരിചയപ്പെട്ടിരുന്നു.

തുടർന്ന് 2020 ൽ നടിയുടെ കോഴിക്കോടുള്ള വീട്ടിൽ ഭക്ഷണമുൾപ്പടെ സമ്മാനങ്ങളുമായി അഫ്‌സല്‍ എത്തി. എന്നാൽ ഇയാളെ കാണാനോ,സമ്മാനം സ്വീകരിക്കാനോ താത്പര്യമില്ലെന്ന് നടി അറിയിച്ചു.

എന്നാല്‍ കഴിഞ്ഞ ദിവസം കൊച്ചിയിലെ ഫ്ലാറ്റിൽ സമ്മാനങ്ങളുമായി വീണ്ടും ഇയാൾ എത്തി. എന്നാൽ കാണാൻ താല്പര്യമില്ലെന്ന് അറിയിച്ചതോടെ സെക്യൂരിറ്റി ഉദ്യോഗസ്ഥർ ഇയാളെ തിരിച്ചയച്ചു. തുടർന്നാണ് നടി പൊലീസിൽ പരാതി നൽകിയത്. സ്ത്രീകളെ പിന്തുടരുന്നതിനെതിരായ വകുപ്പ് പ്രകാരമാണ് യുവാവിനെതിരെ കേസെടുത്തത്.

ഇയാൾക്ക് സ്റ്റേഷൻ ജാമ്യം നൽകുമെന്നും പൊലീസ് അറിയിച്ചു.