എറണാകുളം:വടക്കാഞ്ചേരി ലൈഫ് മിഷന്‍ കേസുമായി ബന്ധപ്പെട്ട് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കരനെ സിബിഐ ചോദ്യം ചെയ്യുന്നു. ഇന്ന് (ഒക്‌ടോബര്‍ 6) ചോദ്യം ചെയ്യലിന് ഹാജരാകാൻ ശിവശങ്കറിന് സിബിഐ നോട്ടീസ് നൽകിയിരുന്നു. രാവിലെ പത്തരയോടെയാണ് ശിവശങ്കര്‍ കൊച്ചിയിലെ സിബിഐ ഓഫിസിലെത്തിയത്.
കേസുമായി ബന്ധപ്പെട്ട് സ്വര്‍ണക്കടത്ത് കേസ് പ്രതികളായ സ്വപ്‌ന സുരേഷ്, സരിത്ത്, സന്ദീപ് നായർ എന്നിവരെയും കേന്ദ്ര അന്വേഷണ ഏജന്‍സി ചോദ്യം ചെയ്‌തിരുന്നു. ഇതിന്‍റെ തുടര്‍ച്ചയായാണ് ശിവശങ്കറിനെ ചോദ്യം ചെയ്യുന്നത്. ശിവശങ്കറിന്‍റെ ലോക്കറില്‍ നിന്ന് പിടിച്ചെടുത്ത ഒരു കോടി രൂപ ലൈഫ് മിഷൻ ഫ്ലാറ്റ് നിർമാണവുമായി ബന്ധപ്പെട്ട് ശിവശങ്കറിന് ലഭിച്ച കമ്മിഷനാണെന്ന് സ്വപ്‌നയും ലൈഫ് മിഷൻ കരാർ ലഭിക്കാൻ 4.48 കോടി രൂപ കമ്മിഷനായി നൽകിയെന്ന് യൂണിടാക് എംഡി സന്തോഷ് ഈപ്പനും നേരത്തെ അന്വേഷണ ഉദ്യോഗസ്ഥര്‍ക്ക് മൊഴി നല്‍കിയിരുന്നു.