എറണാകുളം :ഇലന്തൂർ നരബലിയുടെ പശ്ചാത്തലത്തിൽ, മന്ത്രവാദവും ആഭിചാരവും തടയാൻ നിയമ നിർമാണം ആവശ്യപ്പെട്ടുള്ള പൊതുതാൽപ്പര്യ ഹർജി ഹൈക്കോടതി ഇന്ന് (ഒക്‌ടോബർ 18) പരിഗണിക്കും. നിയമനിർമാണം നടത്താൻ കേന്ദ്ര, സംസ്ഥാന സർക്കാരുകൾക്ക് നിർദേശം നൽകണമെന്നാണാവശ്യപ്പെട്ട് കേരള യുക്തിവാദി സംഘമാണ് ഹർജി നൽകിയത്. മഹാരാഷ്ട്ര, കർണാടക സംസ്ഥാനങ്ങളിൽ ഇത്തരം നിയമങ്ങള്‍ നടപ്പിലാക്കിയിട്ടുണ്ട്.
സമാനമായ കൊലപാതകങ്ങൾ കേരളത്തിൽ ഇതിനുമുൻപും നടന്നിരുന്നുവെന്നും ഈ സാഹചര്യത്തിൽ അടിയന്തരമായി ഇത്തരം അനാചാരങ്ങൾ തടയാൻ നിയമനിർമാണം ആവശ്യമാണെന്നും ഹർജിയിൽ പറയുന്നു. നേരത്തെ പല തവണ നിയമസഭയിൽ ഇത് സംബന്ധിച്ച ബില്‍ വന്നിരുന്നുവെങ്കിലും പലവിധ കാരണങ്ങളാൽ പാസാക്കിയിരുന്നില്ല. 1955 മുതൽ കേരളത്തിൽ വിവിധ ജില്ലകളിൽ ആഭിചാരക്രിയകളുടെ പേരിൽ ആളുകൾ കൊല്ലപ്പെടുന്നുണ്ട്. എന്നിട്ടും, ഇക്കാര്യത്തിൽ നിയമം മൂലം നടപടി സ്വീകരിക്കാൻ അധികൃതർ തയ്യാറാകുന്നില്ലെന്നും സംസ്ഥാന സർക്കാർ മൂക സാക്ഷിയായി നിലകൊള്ളുകയാണെന്നും ഹർജിയിൽ ആക്ഷേപമുന്നയിച്ചിട്ടുണ്ട്.