ടിപി വധക്കേസില്‍ ശിക്ഷിക്കപ്പെട്ട് ജയിലിൽ കഴിയുന്ന സിപിഎം നേതാവ് പി.കെ കുഞ്ഞനന്തന് പിന്തുണ നൽകി സർക്കാർ ഹൈക്കോടതിയില്‍ സത്യവാങ്മൂലം നല്‍കി. കുഞ്ഞനന്തന് ജയിലില്‍ നല്ലനടപ്പുകാരനാണെന്നും പരോൾ അനുവദിച്ചിട്ടുളളത് നിയമാനുസൃതമാണെന്നും സത്യവാങ്മൂലത്തില്‍ പറയുന്നു.കുഞ്ഞനന്തന് പരോള്‍ നല്‍കിയതിനെതിരെ കെ.കെ.രമ നല്‍കിയ ഹര്‍ജി അനാവശ്യമെന്നും രമയുടെ ഹർജി നിയമാനുസൃതം നിലനില്‍ക്കുന്നതല്ലെന്ന് ചൂണ്ടിക്കാട്ടിയുമാണ് ഹൈക്കോടതിയില്‍ സര്‍ക്കാർ സത്യവാങ്മൂലം സമർപ്പിച്ചത്.
കുഞ്ഞനന്തൻ മര്യാദരാമനെന്ന് സർക്കാർ ഹൈക്കോടതിയിൽ - high court
കുഞ്ഞനനന്തന്‍ ഒരിക്കല്‍ പോലും മോശം പെരുമാറ്റത്തിന്‍റെ പേരില്‍ അച്ചടക്ക നടപടി നേരിട്ടിട്ടില്ല. ഇത് പരിഗണിച്ചാണ് കുഞ്ഞനന്തന് പരോള്‍ അനുവദിച്ചതെന്നും സര്‍ക്കാര്‍.
പി.കെ കുഞ്ഞനന്തൻ
2014 ജനുവരി 28നാണ് കുഞ്ഞനന്തന്‍റെ ആദ്യ പരോള്‍ അപേക്ഷ കിട്ടിയത് .അന്ന് അത് പരിശോധിച്ച ജില്ലാ പൊലീസ് സൂപ്രണ്ടും പ്രൊബേഷന്‍ ഓഫിസറും പരോള്‍ നിഷേധിച്ചിരുന്നു . അച്ചടക്കവും നല്ല നടപ്പും പാലിക്കുന്ന കുഞ്ഞനനന്തന്‍ ഒരിക്കല്‍ പോലും മോശം പെരുമാറ്റത്തിന്‍റെ പേരില്‍ ജയിലിൽ അച്ചടക്ക നടപടി നേരിട്ടിട്ടില്ല . ഇത് പരിഗണിച്ചാണ് പിന്നീട് കുഞ്ഞനന്തന്‍റെ പരോള്‍ അപേക്ഷകള്‍ പരിഗണിച്ചതും പരോള്‍ അനുവദിച്ച് നൽകിയിട്ടുളളതും.
2014 മുതല്‍ 2017 വരെയുള്ള കാലയളവില്‍ കുഞ്ഞനന്തന് 60 ദിവസത്തെ അടിയന്തര പരോളും 135 ദിവസത്തെ സാധാരണ പരോളുമാണ് നല്‍കിയട്ടുള്ളത് . കൂടാതെ ഒരുവര്‍ഷത്തിൽ അറുപത് ദിവസത്തിന് മുകളില്‍ സാധാരണ പരോള്‍ അനുവദിച്ചിട്ടുമില്ല . മാത്രമല്ല ,സര്‍ക്കാരിന്‍റെ അനുമതി മുന്‍കൂട്ടി തേടി നിയമാനുസൃതമായാണ് അടിയന്തര പരോളുകൾ നൽകിയിട്ടുളളതും. ഒരു രാഷ്ട്രീയ പരിഗണനയും കുഞ്ഞനന്തന് നൽകിയിട്ടില്ലെന്നും അതിനാൽ തന്നെ ചട്ടം ലംഘിച്ച് പരോള്‍ അനുവദിച്ചെന്ന കെ.കെ.രമയുടെ വാദം നിലനില്‍ക്കില്ലെന്നും ആഭ്യന്തരവകുപ്പ് സമർപ്പിച്ച എതിര്‍ സത്യവാങ്മൂലത്തില്‍ ചൂണ്ടിക്കാട്ടി.