എറണാകുളം: കോതമംഗലത്തെ ആദിവാസി മേഖലയിലെ കൊവിഡ് പരിശോധനക്ക് മൊബൈല്‍ യൂണിറ്റുകള്‍. ആന്‍റിജന്‍ ടെസ്റ്റ് നടത്താനുള്ള സൗകര്യമാണ് യൂണിറ്റുകളില്‍ ഉള്ളത്. ബ്ലോക്ക് പഞ്ചായത്തിന്‍റെ ആഭിമുഖ്യത്തിലാണ് പരിശോധന. കുട്ടംമ്പുഴയിലെ ആദിവാസി മേഖലകളില്‍ ഉള്‍പ്പെടെ ബ്ലോക്കിലെ പത്ത് പഞ്ചായത്തിലും ഇത്തരത്തില്‍ ടെസ്റ്റ് നടത്തും.
ആദിവാസി മേഖലയിലെ കൊവിഡ് വ്യാപനം മുന്നില്‍ കണ്ടാണ് നടപടി. സമ്പര്‍ക്ക രോഗ വ്യാപനം ഉണ്ടാകാന്‍ ഇടയുള്ള സാഹചര്യത്തിലാണ് തീരുമാനം. ജില്ലയിലെ പ്രധാന ആദിവാസി മേഖലയാണ് കുട്ടമ്പുഴ പഞ്ചായത്ത്. വെള്ളാരംകുത്ത് ആദിവാസി കുടിയിൽ പദ്ധതിയുടെ ഉദ്‌ഘാടനം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ നിര്‍വഹിച്ചു.
ആദിവാസി മേഖലയെ മുന്നില്‍ കണ്ട് കോതമംഗലത്ത് കൊവിഡ് പരിശോധനക്ക് മൊബൈല്‍ യൂണിറ്റ്.