കൊച്ചി മെട്രോ; രണ്ടാം ഘട്ടത്തിന്‍റെ പ്രാരംഭ നടപടികള്‍ ആരംഭിച്ചു

കൊച്ചി മെട്രോയുടെ രണ്ടാം ഘട്ട നിര്‍മാണം ജനുവരിയില്‍ തുടങ്ങാനാകുമെന്ന പ്രതീക്ഷയില്‍ കെഎംആര്‍എല്‍

എറണാകുളം: കൊച്ചി മെട്രോ റെയിൽ രണ്ടാം ഘട്ടത്തിന്‍റെ പ്രാരംഭ നടപടികളുടെ ഭാഗമായുള്ള ഡ്രോൺ സർവ്വേ ആരംഭിച്ചു. ജവഹർലാൽ നെഹ്റു സ്റ്റേഡിയം മെട്രോ സ്റ്റേഷൻ മുതൽ കാക്കനാട് ഇൻഫോപാർക്ക് വരെ കൊച്ചി മെട്രോയുടെ രണ്ടാം ഘട്ട പദ്ധതിയുടെ പാതയിലാണ് ഡ്രോൺ സർവേ നടക്കുന്നത്. മെട്രോ അലൈൻമെന്‍റിന്‍റെ സൂക്ഷ്‌മ ക്രമീകരണത്തിനായാണ് പ്രധാനമായും സർവേ നടത്തുന്നത്.

മെട്രോയുടെ രണ്ടാം ഘട്ടം കടന്നുപോകുന്ന മേഖലകളിലെ ഭൂപ്രകൃതിയിൽ കഴിഞ്ഞ ഏതാനും നാളുകളായി വന്നിരിക്കുന്ന മാറ്റങ്ങൾ മനസ്സിലാക്കുകയാണ് സർവേയുടെ ലക്ഷ്യം. രണ്ടാം ഘട്ടത്തിലുളള നോൺ മോട്ടോറൈസ്‌ഡ് ട്രാൻസ്പോട്ട് പദ്ധതികളും ഫസ്റ്റ് ആൻഡ് ലാസ്റ്റ് മൈൽ കണക്റ്റിവിറ്റി പദ്ധതികളും തയ്യാറാക്കുന്നതിനായി സർവ്വേ സഹായകരമാകും. കൊച്ചി മെട്രോ റെയിൽ പദ്ധതിയുടെ രണ്ടാം ഘട്ടത്തിന് കഴിഞ്ഞയാഴ്ച്ച കേന്ദ്ര സർക്കാറിന്‍റെ അംഗീകാരം ലഭിച്ചിരുന്നു.

പ്രൊജക്റ്റ് മാനേജ്മെന്‍റ് കൺസൾട്ടൻസിയെ കണ്ടെത്തുന്നതിനായുള്ള ടെൻഡർ കെഎംആർഎൽ(കൊച്ചി മെട്രോ റെയില്‍ ലിമിറ്റഡ്) ഈ ആഴ്‌ച പ്രസിദ്ധീകരിക്കും. രണ്ടാം ഘട്ടത്തിന്‍റെ ജിയോടെക്‌നിക്കൽ ഇൻവെസ്റ്റിഗേഷൻ ഒക്ടോബർ ആദ്യവാരം തുടങ്ങാനാണ് തീരുമാനം. കൊച്ചി മെട്രോ റെയിൽ പദ്ധതിയുടെ രണ്ടാം ഘട്ടത്തിന്‍റെ നിർമാണം ആരംഭിക്കുന്നതിന് മുന്നോടിയായി റോഡ് വീതി കൂട്ടുന്നത് അടക്കമുള്ള പ്രാരംഭ പ്രവർത്തനങ്ങൾ പുരോഗമിക്കുകയാണ്.

പാലാരിവട്ടം ജംഗ്ഷൻ മുതൽ ഇൻഫോപാർക്ക് വരെയാണ് റോഡ് വീതി കൂട്ടുന്നത്. ഇത് 75 ശതമാനം പൂർത്തിയായി. മെട്രോ സ്റ്റേഷനുകൾക്ക് ആവശ്യമായ ഭൂമി ഏറ്റെടുക്കൽ നടപടികൾക്കായുള്ള ഭരണാനുമതി സംസ്ഥാന സർക്കാർ ഉടൻ നൽകും. രണ്ടാം ഘട്ടത്തിന്‍റെ നിർമ്മാണം 2023 ജനുവരി അവസാനത്തോടെ തുടങ്ങാനാകുമെന്നാണ് കെഎംആർഎല്ലിന്‍റെ പ്രതീക്ഷ.