ലക്ഷദ്വീപ് മയക്കുമരുന്ന് വേട്ട: അന്വേഷണം ഊർജിതമാക്കി ഡി.ആർ.ഐയും കോസ്റ്റ് ഗാർഡും

തമിഴ്‌നാട്ടിൽ നിന്നെത്തിയ മത്സ്യബന്ധന ബോട്ടിൽ നിന്നും മെയ് 18നാണ് 218 കിലേഗ്രാം ഹെറോയിൻ പിടിച്ചെടുത്തത്. അന്താരാഷ്ട്ര നിയമവിരുദ്ധ വിപണിയിൽ ഏകദേശം 1526 കോടി രൂപയോളം വിലവരുന്നതാണ് പിടികൂടിയ ഹെറോയിൻ.

എറണാകുളം: ലക്ഷദ്വീപ് തീരത്ത് മയക്കുമരുന്ന് പിടികൂടിയ സംഭവത്തിൽ അന്വേഷണം ഊർജിതമാക്കി ഡി.ആർ.ഐയും കോസ്റ്റ് ഗാർഡും. കന്യാകുമാരി, നാഗർകോവിൽ മേഖലയിലാണ് പരിശോധന തുടരുന്നത്. അതേസമയം കഴിഞ്ഞ ദിവസം പിടിച്ചെടുത്ത ബോട്ടുകളുടെ ഉടമകളും പിടിയിലായതായാണ് സൂചന. സംഭവത്തിൽ ദേശീയ അന്വേഷണ ഏജൻസി, ഡി.ആർ.ഐയിൽ നിന്ന് വിവരങ്ങൾ തേടിയിട്ടുണ്ട്.

ഡി.ആർ.ഐയും കോസ്റ്റ് ഗാർഡും സംയുക്തമായി നടത്തിയ പരിശോധനയിലാണ് തമിഴ്‌നാട്ടിൽ നിന്നെത്തിയ മത്സ്യബന്ധന ബോട്ടിൽ നിന്നും മെയ് 18ന് 218 കിലേഗ്രാം ഹെറോയിൻ പിടിച്ചെടുത്തത്. ഹെറോയിൻ കടത്താനുപയോഗിച്ച പ്രിൻസ്, ലിറ്റിൽ ജീസസ് എന്നീ ബോട്ടുകളും പിടിച്ചെടുത്തിരുന്നു. സമീപകാലത്ത് നടന്ന ഏറ്റവും വലിയ ലഹരി വേട്ടയായിരുന്നു ഇത്. അന്താരാഷ്ട്ര നിയമവിരുദ്ധ വിപണിയിൽ ഏകദേശം 1526 കോടി രൂപയോളം വിലവരുന്നതാണ് പിടികൂടിയ ഹെറോയിൻ.

രണ്ട് മത്സ്യബന്ധന ബോട്ടുകളിലായി ഒരു കിലോഗ്രാമിന്‍റെ 218 പാക്കറ്റുകളായാണ് ഹെറോയിൻ സൂക്ഷിച്ചിരുന്നത്. ബോട്ടിലുണ്ടായിരുന്ന മത്സ്യത്തൊഴിളികളെയും കസ്റ്റഡിയിലെടുത്തിരുന്നു. പിടിയിലായ മത്സ്യത്തൊഴിലാളികളിൽ നാലു പേർ മലയാളികളാണെന്നാണ് സൂചന. ഹെറോയിൻ പിടികൂടിയ മത്സ്യബന്ധന ബോട്ടുകൾ കൊച്ചിയിലെ കോസ്റ്റ് ഗാർഡ് ആസ്ഥാനത്ത് എത്തിച്ചാണ് വിശദമായ പരിശോധന നടത്തിയത്.