കെ റെയിൽ രേഖകൾ: വിവിധ ഹർജികളിൽ ഹൈക്കോടതി വാദം ഇന്ന്

റെയിൽവെ മന്ത്രാലയം നൽകിയ വിശദീകരണത്തിൽ കെ റെയിൽ കോർപ്പറേഷനെതിരെ വിമർശനം ഉന്നയിച്ചിരുന്നു. ആവശ്യപ്പെട്ട രേഖകൾ ഹാജരാക്കുന്നില്ലെന്നായിരുന്നു വിമർശനം.

എറണാകുളം: കെ റെയിലുമായി ബന്ധപ്പെട്ട വിവിധ ഹർജികളിൽ ഹൈക്കോടതി ഇന്ന്(26.09.2022) വീണ്ടും വാദം കേൾക്കും. പദ്ധതിയുമായി ബന്ധപ്പെട്ട രേഖകൾ കെ റെയിൽ കോർപറേഷൻ നൽകുന്നില്ലെന്ന് റെയിൽവേ കഴിഞ്ഞ ദിവസം കോടതിയെ അറിയിച്ചിരുന്നു. കെ റെയിലുമായി ബന്ധപ്പെട്ട വിവിധ ഹർജികളിൽ ജസ്റ്റിസ് ദേവൻ രാമചന്ദ്രന്‍റെ ബെഞ്ചാണ് വാദം കേൾക്കുന്നത്.

കഴിഞ്ഞ ദിവസം റെയിൽവെ മന്ത്രാലയം നൽകിയ വിശദീകരണത്തിൽ കെ റെയിൽ കോർപ്പറേഷനെതിരെ വിമർശനം ഉന്നയിച്ചിരുന്നു. ആവശ്യപ്പെട്ട രേഖകൾ ഹാജരാക്കുന്നില്ലെന്നായിരുന്നു വിമർശനം. അലൈൻമെന്‍റ് , പദ്ധതിക്കാവശ്യമായി വരുന്ന സ്വകാര്യ ഭൂമി, റെയിൽവേ ഭൂമി എന്നിവയുടെ വിശദാംശങ്ങൾ നൽകിയിട്ടില്ലെന്നാണ് റെയിൽവേ ഹൈക്കോടതിയെ അറിയിച്ചിട്ടുള്ളത്.

തുടർച്ചയായി രേഖകൾ കെ ആർ ഡി സെല്ലിനോട് ആവശ്യപ്പെട്ടെങ്കിലും മറുപടി ഉണ്ടായില്ലെന്നും റെയിൽവേയ്ക്ക്‌ വേണ്ടി ഡെപ്യൂട്ടി സോളിസിറ്റർ ജനറൽ എസ് മനു നൽകിയ വിശദീകരണ പത്രികയിൽ പറഞ്ഞിരുന്നു. അതു കൊണ്ടു തന്നെ ഡിപിആർ അപൂർണമാണെന്ന മുൻ നിലപാടിൽ ഉറച്ചു നിൽക്കുന്നതായും റെയിൽവേ കോടതിയെ അറിയിച്ചിട്ടുണ്ട്. കെ റെയിലിനായി സാമൂഹികാഘാത പഠനവും കല്ലിടലും നടത്തിയത് കേന്ദ്രാനുമതി ഇല്ലാതെയാണെന്നും പദ്ധതിയ്ക്ക് സാമ്പത്തികാനുമതി നൽകിയിട്ടില്ലെന്നും കേന്ദ്ര സർക്കാർ നേരത്തെ ഹൈക്കോടതിയെ അറിയിച്ചിരുന്നു.

ഡിപിആർ സമർപ്പിക്കുന്നതിനായിരുന്നു തത്വത്തിൽ അനുമതി നൽകിയതെന്നും വ്യക്തമാക്കിയിട്ടുണ്ട്.