എറണാകുളം : മുഖ്യമന്ത്രിയുടെ ഓഫിസിനെതിരായ ആരോപണങ്ങൾ അടങ്ങിയ ഹർജി പിൻവലിക്കാനുള്ള അപേക്ഷയിൽ ഐ ജി ജി.ലക്ഷ്‌മണിന് ഹൈക്കോടതിയുടെ രൂക്ഷ വിമർശനം (High Court Criticizes IG G Lakshman). ഹർജിയിലെ പരാമർശങ്ങൾക്ക് അഭിഭാഷകനെ പഴിചാരി രക്ഷപ്പെടാനാകില്ലെന്ന് ജസ്റ്റിസ് പിവി കുഞ്ഞികൃഷ്‌ണന്‍ നിരീക്ഷിച്ചു. അഭിഭാഷകനെ പഴിചാരിയുള്ള സത്യവാങ്മൂലം പിൻവലിച്ച് പുതിയ സത്യവാങ്മൂലം സമർപ്പിക്കാൻ നിർദേശിച്ചിട്ടുമുണ്ട്.
മുഖ്യമന്ത്രിയുടെ ഓഫിസിനെതിരെ ഗുരുതര പരാമർശങ്ങൾ അടങ്ങിയ ഹർജി പിൻവലിക്കുന്നതിനായി ഐജി ജി.ലക്ഷ്‌മൺ നൽകിയ അപേക്ഷ പരിഗണിക്കവെയാണ് ഹൈക്കോടതിയുടെ ഭാഗത്തുനിന്നും രൂക്ഷ വിമർശനമുണ്ടായത്. തന്‍റെ അറിവോടെയല്ല, മുഖ്യമന്ത്രിക്കെതിരായ പരാമർശങ്ങൾ ഹർജിയിൽ ഉൾപ്പെടുത്തിയതെന്നും അഭിഭാഷകൻ കൂട്ടിച്ചേർത്തതാണെന്നുമായിരുന്നു ലക്ഷ്‌മണിന്‍റെ വിശദീകരണം.
ഹർജിയിലെ പരാമർശങ്ങൾക്ക് അഭിഭാഷകനെ പഴിചാരി രക്ഷപ്പെടാനാകില്ലെന്ന് വിമർശിച്ച ജസ്റ്റിസ് പി.വി കുഞ്ഞികൃഷ്‌ണന്‍ ഇത്തരം സംഭവങ്ങള്‍ കോടതി നടപടികള്‍ പ്രഹസനമാക്കുന്നതിന് തുല്യമാണെന്നും ഐജി റാങ്കിലുള്ള ഉദ്യോഗസ്ഥനാണ് ആരോപണം ഉന്നയിക്കുന്നതെന്നും കുറ്റപ്പെടുത്തി. കൂടാതെ ആരോപണങ്ങൾ അഭിഭാഷകന്‍റെ ഭാവിയെ ബാധിക്കുന്നതാണ്. അഭിഭാഷകനെ പഴിചാരിയുള്ള സത്യവാങ്മൂലം പിൻവലിച്ച് പുതിയത് സമർപ്പിക്കണമെന്നും അല്ലാത്തപക്ഷം കനത്ത പിഴ ചുമത്തേണ്ടി വരുമെന്നും ഹൈക്കോടതി ജി ലക്ഷ്‌മണിന് മുന്നറിയിപ്പ് നൽകി.
ഹർജി നേരത്തെ സമർപ്പിച്ച അഡ്വ. നോബിൾ മാത്യുവിനെ മാറ്റി പകരം അഡ്വ. എസ് രാജീവ് മുഖാന്തരമായിരുന്നു പിൻവലിക്കാനുള്ള അപേക്ഷ ലക്ഷ്‌മൺ നൽകിയത്. മോൻസൻ മാവുങ്കൽ പുരാവസ്‌തു തട്ടിപ്പിലെ ഗൂഢാലോചനക്കേസിൽ പ്രതി ചേർത്ത നടപടി റദ്ദാക്കണമെന്നാവശ്യപ്പെട്ടുള്ള ഹർജിയിലായിരുന്നു മുഖ്യമന്ത്രിയുടെ ഓഫിസിനെതിരായ ഐജി ഗുഗുലോത്ത് ലക്ഷ്‌മണിന്‍റെ ഗുരുതര ആരോപണങ്ങൾ.