എറണാകുളം: ചെറിയ കേസുകൾക്ക് കുറ്റപത്രം ആവശ്യമുണ്ടോ എന്ന് പൊലീസ് പരിശോധിക്കണമെന്ന് ഹൈക്കോടതി (high court about charge sheet for minor cases). വസ്‌തുതകളും സാഹചര്യങ്ങളും പരിശോധിച്ച ശേഷം സാമാന്യ ബോധം ഉപയോഗിച്ച് ഇക്കാര്യത്തിൽ പൊലീസ് തീരുമാനം എടുക്കണം. പല കേസുകളും പൊലീസ് സ്റ്റേഷനിൽ വച്ച് തന്നെ അവസാനിപ്പിക്കാവുന്നതാണ് എന്നും ഹൈക്കോടതി വ്യക്തമാക്കി. (High court asks police to check if charge sheet is required for minor case).
പൊതുമുതൽ നശിപ്പിച്ചതിനെടുത്ത കേസിന്‍റെ കുറ്റപത്രം റദ്ദാക്കിക്കൊണ്ടാണ് ചെറിയ കേസുകൾക്ക് കുറ്റപത്രം ആവശ്യമുണ്ടോ എന്ന കാര്യം പൊലീസ് പരിശോധിക്കണമെന്ന ഹൈക്കോടതിയുടെ സുപ്രധാന ഉത്തരവ്. 2015ലെ തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിൽ ഇലക്ട്രിക് പോസ്റ്റിൽ പോസ്റ്റർ പതിപ്പിച്ച് കെ എസ് ഇ ബിക്ക് 63 രൂപ നഷ്‌ടമുണ്ടാക്കി എന്ന് ആരോപിച്ചായിരുന്നു കേസ്.
ഇത്തരം ചെറിയ കേസുകളിൽ കുറ്റപത്രം സമർപ്പിക്കും മുൻപ് സാമാന്യ ബോധം പൊലീസ് പ്രയോഗിക്കണം. ശാസനയിൽ ഒതുക്കേണ്ട കേസുകൾക്ക് പോലും കുറ്റപത്രം സമർപ്പിക്കുന്നത് കോടതികളുടെ സമയം പാഴാക്കുകയും അധിക ബാധ്യത ഉണ്ടാക്കുകയും ചെയ്യുന്നുണ്ട്. പല കേസുകളും പൊലീസ് സ്റ്റേഷനിൽ വച്ച് തന്നെ അവസാനിപ്പിക്കാൻ സാധിക്കും. ഇക്കാര്യത്തിൽ പൊലീസ് ഉദ്യോഗസ്ഥർക്ക് ക്ലാസുകൾ നൽകേണ്ടതാണ് എന്നും ജസ്റ്റിസ് പി വി കുഞ്ഞികൃഷ്‌ണൻ ചൂണ്ടിക്കാട്ടി.
ഉത്തരവിന്‍റെ പകർപ്പ് സംസ്ഥാന പൊലീസ് മേധാവിക്ക് കൈമാറാനും കോടതി വ്യക്തമാക്കിയിട്ടുണ്ട്. തൃശൂർ സ്വദേശിയ്‌ക്കെതിരായ അഡീഷണൽ സെഷൻസ് കോടതിയുടെ കീഴിലുള്ള കേസിന്മേലുള്ള നടപടികളും ഹൈക്കോടതി റദ്ദാക്കി.