എറണാകുളം: മതവിദ്വേഷ പ്രസംഗം നടത്തിയ കേസില്‍, പൂഞ്ഞാര്‍ മുന്‍ എം.എല്‍.എ പി.സി ജോര്‍ജ് നല്‍കിയ മുന്‍കൂര്‍ ജാമ്യാപേക്ഷ ഹൈക്കോടതി ഇന്ന് പരിഗണിക്കും. ജില്ല സെഷൻസ് കോടതി കഴിഞ്ഞ ദിവസം പി.സിയുടെ മുൻകൂർ ജാമ്യാപേക്ഷ തള്ളിയിരുന്നു. ഇതില്‍, വസ്‌തുതകൾ പരിഗണിക്കാതെയാണ് ജില്ല സെഷൻസ് കോടതി ജാമ്യം നിരസിച്ചതെന്നായിരുന്നു മുന്‍ എം.എല്‍.എയുടെ ആരോപണം.
മതസൗഹാർദം തകർക്കുന്ന രീതിയിൽ പ്രസംഗിച്ചിട്ടില്ല. കേസ് രാഷ്ട്രീയ പ്രേരിതമെന്നും ഹർജിയിൽ പറയുന്നു. മെയ് എട്ടിനാണ്, കേസിനാസ്‌പദമായ സംഭവം. എറണാകുളം വെണ്ണല ക്ഷേത്രത്തിലെ ഉത്സവത്തോടനുബന്ധിച്ച് നടത്തിയ പ്രസംഗത്തിലാണ് വിദ്വേഷ പരാമര്‍ശം നടത്തിയത്. പാലാരിവട്ടം പൊലീസാണ് ജോര്‍ജിനെതിരെ ജാമ്യമില്ല കുറ്റം ചുമത്തി കേസെടുത്തത്.