നടിയെ ആക്രമിച്ച കേസ്: ദിലീപിന്‍റെ ഗ്രാൻഡ് പ്രൊഡക്ഷൻ ഹൗസിലും ക്രൈംബ്രാഞ്ച് പരിശോധന

ദിലീപിന്‍റെ ആലുവയിലെ വീട്ടിലും സഹോദരന്‍റെ പറവൂർ കവലയിലെ വീട്ടിലും ക്രൈംബ്രാഞ്ച് സംഘം പരിശോധന തുടരുകയാണ്.

എറണാകുളം:നടിയെ ആക്രമിച്ച കേസിൽ നടൻ ദിലീപിന്‍റെ കൊച്ചിയിലെ സിനിമ നിർമാണ കമ്പനിയായ ഗ്രാൻഡ് പ്രൊഡക്ഷൻ ഹൗസിലും ക്രൈംബ്രാഞ്ച് പരിശോധന തുടങ്ങി. ഉച്ചയ്ക്ക് ഒരു മണിയോടെയാണ് അന്വേഷണ സംഘം ഇവിടെ പരിശോധനയ്ക്ക് എത്തിയത്. എന്നാൽ ഓഫിസ് അടച്ചതിനാൽ ഉള്ളിലേക്ക് കടക്കാൻ കഴിഞ്ഞില്ല.

ഒന്നേകാൽ മണിക്കൂർ സമയം കാത്ത് നിന്നതിന് ശേഷമാണ് ജീവനക്കാർ എത്തി ഓഫിസ് തുറന്ന് കൊടുത്തത്. ദിലീപിന്‍റെ അഭിഭാഷകരും ഇവിടെയെത്തി. അഭിഭാഷകരുടെ സാന്നിധ്യത്തിലാണ് നിർമാണ കമ്പനി ഓഫിസിൽ പരിശോധന തുടരുന്നത്. നടിയെ ആക്രമിച്ച കേസിലെ അന്വേഷണ ഉദ്യോഗസ്ഥനായ ബൈജു പൗലോസിന്‍റെ നേതൃത്വത്തിലുള്ള അഞ്ചംഗ സംഘമാണ് പരിശോധന നടത്തുന്നത്. നിർമാണ കമ്പനിയിലെ കംപ്യൂട്ടർ ഉൾപ്പെടെ വിശദമായി പരിശോധിക്കുകയാണ് അന്വേഷണ ഉദ്യോഗസ്ഥരുടെ ലക്ഷ്യം.

അതേസമയം ദിലീപിന്‍റെ ആലുവയിലെ വീട്ടിലും സഹോദരന്‍റെ പറവൂർ കവലയിലെ വീട്ടിലും ക്രൈംബ്രാഞ്ച് സംഘം പരിശോധന തുടരുകയാണ്. ആലുവയിലെ 'പത്മസരോവരം' വീട്ടിൽ എസ്.പി മോഹനചന്ദ്രന്‍റെ നേതൃത്വത്തിലുള്ള 20 അംഗസംഘം രാവിലെ 11.45ഓടെയാണ് പരിശോധന തുടങ്ങിയത്. കോടതിയുടെ അനുമതിയോടെയാണ് ഒരേസമയം മൂന്നിടങ്ങളിൽ പരിശോധന. ദിലീപ് ആലുവയിലെ വീട്ടിൽ ഉണ്ടെന്ന് എസ്.പി മോഹനചന്ദ്രൻ പറഞ്ഞു.

നടിയെ ആക്രമിച്ച കേസിൽ സംവിധായകൻ ബാലചന്ദ്രകുമാറിന്‍റെ വെളിപ്പെടുത്തലിന്‍റെ അടിസ്ഥാനത്തിലാണ് ക്രൈംബ്രാഞ്ച് നിർണായക പരിശോധന നടത്തുന്നത്. ബാലചന്ദ്രകുമാറിന്‍റെ വെളിപ്പെടുത്തലിന്‍റെ അടിസ്ഥാനത്തിൽ അന്വേഷണ ഉദ്യോഗസ്ഥനെ അപായപ്പെടുത്താൻ ഗൂഢാലോചന നടത്തിയെന്ന പേരിൽ പുതിയൊരു കേസ് കൂടി രജിസ്റ്റർ ചെയ്തിരുന്നു. വെള്ളിയാഴ്ച ദിലീപിന്‍റെ മുൻകൂർ ജാമ്യാപേക്ഷ ഹൈക്കോടതി പരിഗണിക്കുന്നതിന് മുമ്പ് കേസുമായി ബന്ധപ്പെട്ട് കൂടുതൽ വിരങ്ങൾ ശേഖരിക്കുക കൂടിയാണ് അന്വേഷണ സംഘത്തിന്‍റെ ലക്ഷ്യം.

പുതിയ വെളിപ്പെടുത്തലിന്‍റെ അടിസ്ഥാനത്തിൽ ഈ മാസം 20നകം റിപ്പോർട്ട് സമർപ്പിക്കാൻ വിചാരണ കോടതിയും അന്വേഷണ സംഘത്തിന് നിർദേശം നൽകിയിരുന്നു. നടിയെ ആക്രമിച്ച് പകർത്തിയ ദൃശ്യങ്ങൾ ദിലീപിന് ലഭിച്ചിരുന്നതായും ക്രൈംബ്രാഞ്ചിന് മൊഴി ലഭിച്ചിരുന്നു. അന്വേഷണ ഉദ്യോഗസ്ഥനെ അപായപ്പെടുത്താൻ ഗൂഢാലോചന നടന്നുവെന്ന് ശബ്‌ദരേഖ ഉൾപ്പെടെയുള്ള തെളിവുകൾ സഹിതമായിരുന്നു ബാലചന്ദ്രകുമാർ പുറത്ത് വിട്ടത്.