എറണാകുളം:ഇന്ധന വിലവർധനവിനെതിരെ വേറിട്ട പ്രതിഷേധവുമായി എറണാകുളം ജില്ല കോൺഗ്രസ് കമ്മിറ്റി. പൊതു ജനങ്ങൾക്ക്‌ 71 ലിറ്റർ പെട്രോൾ സൗജന്യമായി വിതരണം ചെയ്‌തായിരുന്നു പ്രതിഷേധം. പ്രധാനമന്ത്രി നരേന്ദ്ര മോദിയുടെ 71 വയസിനെ സൂചിപ്പിച്ചാണ് 71 ലിറ്റർ വിതരണം ചെയ്‌തത്.
പ്രതിഷേധം പ്രധാനമന്ത്രിക്ക് എതിരെ
പെട്രോളിയം ഉത്പന്നങ്ങളിൽ രാജ്യത്ത് നടക്കുന്നത് നികുതി ഭീകരതയാണെന്ന് പ്രതിഷേധം ഉദ്ഘാടനം ചെയ്‌ത ഹൈബി ഈഡൻ എം.പി കുറ്റപ്പെടുത്തി. പെട്രോളിയം ഉത്‌പന്നങ്ങളെക്കാൾ കൂടുതൽ നികുതി ചുമത്തി സാധാരണക്കാരന്‍റെ ജീവിതം പ്രതിസന്ധിയിലാക്കുകയാണ് ഭരണകൂടങ്ങൾ. ജി.എസ്‌.ടിയിൽ പെട്രോളിയത്തെ ഉൾപ്പെടുത്താത്തതും കുറ്റകരമായ അനാസ്ഥയാണെന്നും ഹൈബി ഈഡന്‍ ചൂണ്ടിക്കാട്ടി.
വില നിയന്ത്രണാധികാരം എണ്ണ കമ്പനികൾക്ക് നൽകിയ കേന്ദ്ര സർക്കാർ വില കുറയ്ക്കാൻ ഒന്നും ചെയ്യുന്നില്ലെന്ന് 'പ്രതിഷേധ പെട്രോൾ' സ്വീകരിക്കാനെത്തിയ പ്രദേശവാസി അഗസ്റ്റിൻ പറഞ്ഞു. ഇരുചക്ര വാഹന ഉടമകളായിരുന്നു കോൺഗ്രസിന്‍റെ സൗജന്യ പെട്രോൾ വിതരണം ഉപയോഗപ്പെടുത്തിയത്.