എറണാകുളം:കൊവിഡ് വ്യാപനത്തിന്‍റെ പ്രതിസന്ധിയിലും ചെല്ലാനത്തെ തീരദേശവാസികള്‍ക്ക് ദുരിതം വിതച്ച് കടല്‍ക്ഷോഭം. കൊവിഡ് ക്ലസ്റ്ററായി രൂപപ്പെട്ട ചെല്ലാനം പശ്ചായത്തില്‍ ഇതുവരെ രോഗം സ്ഥിരീകരിച്ചത് 230 പേര്‍ക്കാണ്. എന്നാല്‍ രൂക്ഷമായ കടലാക്രമണത്തെ തുടര്‍ന്ന് കഴിഞ്ഞ ദിവസം കൊവിഡ് പരിശോധനകളും മുടങ്ങി. ക്വാറന്‍റൈനില്‍ കഴിയുന്നവരുടെ വീടുകളിലും വെള്ളം കയറിയതോടെ സ്ഥിതി കൂടുതല്‍ ഗുരുതരമായി. ട്രിപ്പിള്‍ ലോക്ക്‌ഡൗണ്‍ ഏര്‍പ്പെടുത്തിയ പഞ്ചായത്തില്‍ രണ്ട് വാര്‍ഡ്‌ മെമ്പര്‍മാരും രോഗം സ്ഥിരീകരിച്ചവരില്‍ ഉള്‍പ്പെടുന്നു. ചെല്ലാനത്തെ നൂറിലധികം വീടുകളാണ് കടലാക്രമണ ഭീഷണി നേരിടുന്നത്. കടല്‍ഭിത്തി കെട്ടിയിട്ടുണ്ടെങ്കിലും ഭിത്തിക്ക് മുകളിലൂടെ ഭീമന്‍ തിരമാലകള്‍ പലവീടുകൾക്കുള്ളിലേക്ക് പ്രവേശിക്കും.
കൊവിഡിനൊടൊപ്പം കടല്‍ക്ഷോഭവും; ആശങ്കയോടെ ചെല്ലാനം