നിയന്ത്രണം വിട്ട കാർ ചായക്കടയിലേക്ക് ഇടിച്ചുകയറി ഒരാൾ മരിച്ചു ; ഓടിച്ചത് കുട്ടികളെന്ന് ആരോപണം

പ്രായപൂർത്തിയാകാത്ത നാല് ആൺകുട്ടികൾ ഉൾപ്പടെ അഞ്ചുപേരാണ് കാറിലുണ്ടായിരുന്നത്. ഇവരെ പൊലീസ് കസ്റ്റഡിയിലെടുത്തു

എറണാകുളം : ആലുവ തൈക്കാവിന് സമീപം ദേശീയ പാതയിൽ നിയന്ത്രണം വിട്ട കാർ ചായക്കടയിലേയ്ക്ക് ഇടിച്ചുകയറി ഒരാൾ മരിച്ചു. അപകടത്തിൽ ഗുരുതരമായി പരിക്കേറ്റ ആലുവ നൊച്ചിമ സ്വദേശി ബക്കറാണ് മരിച്ചത്. പരിക്കേറ്റ മറ്റ് മൂന്ന് പേർ ചികിത്സയിലാണ്.

കടയിൽ ചായ കുടിച്ചുകൊണ്ടിരിക്കെയാണ് ബക്കർ ഉൾപ്പടെയുള്ളവരുടെ മേലേക്ക് നിയന്ത്രണം വിട്ട കാർ പാഞ്ഞുകയറിയത്. പ്രായപൂർത്തിയാകാത്ത നാല് ആൺകുട്ടികൾ ഉൾപ്പടെ അഞ്ചുപേരാണ് കാറിലുണ്ടായിരുന്നത്.

ഇവരെ പൊലീസ് കസ്റ്റഡിയിലെടുത്തു. ബ്രേക്ക് പോയതാണ് അപകടത്തിന് കാരണമായതെന്നാണ് കാറിലുണ്ടായിരുന്നവർ പൊലീസിന് മൊഴി നൽകിയത്. പ്രായപൂർത്തിയാകാത്ത കുട്ടികളിൽ ഒരാളാണ് കാർ ഓടിച്ചതെന്ന് ആരോപണമുണ്ട്.