ഓട്ടിസം ബാധിതനായ മകനെ ക്രൂരമായി മർദിച്ച സംഭവം; പിതാവിനെതിരെ വധ ശ്രമത്തിന് കേസെടുത്തു

പ്രതിയെ നാളെ കോടതിയിൽ ഹാജരാക്കും.

എറണാകുളം: ഓട്ടിസം ബാധിതനായ മകനെ ക്രൂരമായി മർദിച്ച സംഭവത്തിൽ പിതാവിനെതിരെ വധ ശ്രമത്തിന് കേസെടുത്തു. എറണാകുളം മട്ടാഞ്ചേരി ചെറളായിക്കടവ് സ്വദേശി സുധീറിനെതിരെയാണ് ഫോർട്ട് കൊച്ചി പൊലീസ് കേസെടുത്തത്. വ്യാഴാഴ്‌ചയാണ് കേസിന് ആസ്‌പദമായ സംഭവം നടന്നത്. മകനെ പിതാവ് മർദ്ദിക്കുന്ന ദൃശ്യങ്ങൾ മാതാവ് തന്നെ മൊബൈലിൽ പകർത്തിയതിനെ തുടർന്നാണ് വിവരം പുറംലോകമറിഞ്ഞത്

പതിനെട്ടുകാരനായ മകനെ വീടിനുള്ളിൽ വച്ച് സുധീർ ക്രൂരമായി മർദിക്കുകയായിരുന്നു. മർദിക്കുന്നത് തടയാൻ സുധീറിന്‍റെ അമ്മ ശ്രമിച്ചെങ്കിലും പരാജയപ്പെട്ടു. കുട്ടിയെ തലകീഴായി നിർത്തിയാണ് മർദിച്ചത്. സംഭവത്തിന്‍റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ പ്രദേശവാസികൾ പൊലീസിന് പരാതി നൽകുകയായിരുന്നു.

ഓട്ടിസം ബാധിതനായ മകൻ വികൃതി കാണിക്കുന്നതിൽ പ്രകോപിതനായി ഇയാൾ പലപ്പോഴും മർദിക്കാറുണ്ടായിരുന്നു. ജുവനൈൽ ജസ്‌റ്റിസ് ആക്‌ട് പ്രകാരം ആയുധം ഉപയോഗിച്ച് പരിക്കേൽപ്പിക്കൽ, തടഞ്ഞ് വയ്‌ക്കൽ തുടങ്ങി വിവിധ വകുപ്പുകൾ ചുമത്തിയാണ് ഇയാൾക്കെതിരെ ഫോർട്ട് കൊച്ചി പൊലീസ് കേസെടുത്തത്. ഇയാളെ നാളെ കോടതിയിൽ ഹാജരാക്കും.

ഓട്ടോ ഡ്രൈവറായ സുധീറിന് ഭാര്യയും മൂന്നു മക്കളുമാണുള്ളത്. ഫോർട്ട് കൊച്ചി പൊലീസ് ഇൻസ്‌പെക്‌ടർ പി.കെ ദാസ്, എസ്.ഐ ബിജു എന്നിവരുടെ നേതൃത്വത്തിൽ പ്രതിയുടെ വീട്ടിലെത്തി കുട്ടിയുടെ അമ്മയുടെ മൊഴി രേഖപ്പെടുത്തിട്ടുണ്ട്.

കൂടുതൽ വായനക്ക്:അച്ഛന്‍റെ ക്രൂരത, ഓട്ടിസം ബാധിച്ച കുട്ടിയെ മർദ്ദിക്കുന്ന ദൃശ്യങ്ങൾ പുറത്ത്