എറണാകുളം :സ്വര്‍ണക്കടത്ത് കേസ് അന്വേഷിക്കുന്നഇ.ഡി ഉദ്യോഗസ്ഥർക്കെതിരായ ക്രൈംബ്രാഞ്ച് അന്വേഷണം റദ്ദാക്കിയതിനെതിരെ സർക്കാർ സമർപ്പിച്ച അപ്പീൽ ഹൈക്കോടതി ഫയലിൽ സ്വീകരിച്ചു. ക്രൈംബ്രാഞ്ച് രജിസ്റ്റർ ചെയ്‌ത എഫ്. ഐ. ആറുകൾ ഹൈക്കോടതി സിംഗിള്‍ ബഞ്ചാണ് റദ്ദാക്കിയത്. ഇത് ചോദ്യം ചെയ്ത് സംസ്ഥാന സർക്കാർ നൽകിയ അപ്പീല്‍ ഹൈക്കോടതി ഡിവിഷൻ ബഞ്ച് ഫയലിൽ സ്വീകരിച്ച് എതിർകക്ഷികൾക്ക് നോട്ടിസ് അയച്ചു.
ഇ.ഡി ഡെപ്യൂട്ടി ഡയറക്ടർ പി. രാധാകൃഷ്ണൻ അടക്കമുള്ളവർക്കാണ് നോട്ടിസ്. അപ്പീൽ നാലാഴ്ചയ്ക്ക് ശേഷം വീണ്ടും പരിഗണിക്കും. എഫ്.ഐ.ആറുകൾ റദ്ദാക്കിയ സിംഗിൾ ബഞ്ച് നടപടി നിയമവിരുദ്ധമാണെന്നാണ് സർക്കാർ വാദം.