എറണാകുളം :നടിയെ ആക്രമിച്ച കേസില്‍ തുടരന്വേഷണം റദ്ദാക്കണമെന്നാവശ്യപ്പെട്ട് എട്ടാം പ്രതി ദിലീപ് സമർപ്പിച്ച ഹര്‍ജിക്കെതിരെ പരാതിക്കാരി ഹൈക്കോടതിയെ സമീപിച്ചു. തുടരന്വേഷണം റദ്ദാക്കണമെന്നാവശ്യപ്പെട്ടുള്ള ദിലീപിന്റെ ഹര്‍ജി ഹൈക്കോടതി പരിഗണിക്കവെയാണ് നീക്കം.
കേസില്‍ കക്ഷി ചേരാന്‍ അനുമതി നല്‍കണമെന്നാണ് നടിയുടെ ആവശ്യം. തുടര്‍ന്ന് ഹര്‍ജി പരിഗണിക്കുന്നത് കോടതി അടുത്ത തിങ്കളാഴ്ച്ചയിലേക്ക് മാറ്റി. സംവിധായകന്‍ ബാലചന്ദ്രകുമാറിന്‍റെ വെളിപ്പെടുത്തലിന്‍റെ അടിസ്ഥാനത്തിലുള്ള തുടരന്വേഷണം റദ്ദാക്കണമെന്നാണ് ദിലീപിന്റെ ഹര്‍ജി.
നടിയെ ആക്രമിച്ച കേസ് അട്ടിമറിക്കുന്നതിന് വേണ്ടിയാണ് കെട്ടിച്ചമച്ച ആരോപണത്തിന്റെ അടിസ്ഥാനത്തിൻ തുടരന്വേഷണം നടത്തുന്നതെന്നാണ് ദിലീപിന്റെ ആരോപണം. അന്വേഷണ ഉദ്യോഗസ്ഥനായ ബൈജു പൗലോസിന് തന്നോടുള്ള വ്യക്തി വിരോധമാണ് തുടരന്വേഷണത്തിലേക്ക് നയിച്ചത്. വിചാരണ നീട്ടിക്കൊണ്ടുപോകാനാണ് തുടരന്വേഷണം നടത്തുന്നതെന്നും ദിലീപ് ആരോപിക്കുന്നു.