അന്ധവിശ്വാസങ്ങൾക്കും മന്ത്രവാദത്തിനും വിലങ്ങിടുമെന്ന് മുഖ്യമന്ത്രി പിണറായി വിജയൻ

നിയമസഭയിലെ അസ്സംബ്ലി ചോദ്യോത്തര വേളയിൽ കെ ജെ മാക്സി എംഎൽഎ ഉന്നയിച്ച ചോദ്യത്തിന് രേഖാമൂലമുള്ള മറുപടി നൽകി മുഖ്യമന്ത്രി

തിരുവനന്തപുരം: സംസ്ഥാനത്ത് അന്ധവിശ്വാസങ്ങൾക്കും മന്ത്രവാദത്തിനും എതിരെ നിയമ നിർമ്മാണം കൊണ്ടുവരുന്നത് സർക്കാർ പരിഗണനയിലാണെന്ന് മുഖ്യമന്ത്രി പിണറായി വിജയൻ. ഇത് സംബന്ധിച്ചുള്ള ആഭ്യന്തരവകുപ്പിന്‍റെ ശുപാർശ നിയമപരിഷ്കരണ വകുപ്പിന്‍റെ പരിഗണനയിലാണെന്നും മുഖ്യമന്ത്രി നിയമസഭയിൽ പറഞ്ഞു.
ജനങ്ങളുടെ വിശ്വാസങ്ങളും ആചാരങ്ങളും മുതലെടുത്ത് ശാസ്ത്രീയമല്ലാത്ത പല കാര്യങ്ങളും പ്രചരിപ്പിക്കുകയാണ്. ഇതിനെതിരെ സ്കൂൾ തലം മുതൽ ക്യാമ്പയിൻ നടത്തണമെന്ന് പട്ടികജാതി-പട്ടികവർഗ ക്ഷേമ മന്ത്രി എ കെ ബാലൻ നിയമസഭയിൽ ആവശ്യപ്പെട്ടു. മന്ത്രവാദത്തിന്‍റെ പേരിൽ 10 വർഷത്തിനിടെ രണ്ടു കൊലപാതകങ്ങളും 19 തട്ടിപ്പ് കേസുകളാണ് സംസ്ഥാനത്ത് രജിസ്റ്റർ ചെയ്തതെന്നും മന്ത്രി പറഞ്ഞു.