അരൂര്‍ മണ്ഡലം യു.ഡി.എഫ് പിടിച്ചെടുക്കുമെന്ന് എം.ലിജു

മണ്ഡലത്തിലെ എംഎൽഎയെക്കുറിച്ച് ജനങ്ങൾക്കുണ്ടായിരുന്ന അഭിപ്രായമാണ് അരൂരിൽ ലോക്‌സഭാ തെരഞ്ഞെടുപ്പിൽ, യുഡിഎഫിന് ഭൂരിപക്ഷം നേടിക്കൊടുത്തത്

ആലപ്പുഴ: ഉപതെരഞ്ഞെടുപ്പ് നടക്കാനിരിക്കുന്ന അരൂർ മണ്ഡലം മികച്ച ഭൂരിപക്ഷത്തിൽ എൽഡിഎഫിൽ നിന്നും യുഡിഎഫ് പിടിച്ചെടുക്കുമെന്ന് ആലപ്പുഴ ഡിസിസി പ്രസിഡന്‍റ് അഡ്വ. എം. ലിജു. കേരളത്തിലെ ജനങ്ങൾക്ക് എൽഡിഎഫ് സർക്കാരിനെതിരെയുള്ള വികാരം അരൂരിൽ പ്രതിഫലിക്കുമെന്ന് ലിജു പറഞ്ഞു.

സംസ്ഥാന സർക്കാരിന്‍റെ ജനവിരുദ്ധ നയങ്ങൾക്കെതിരെയുള്ള വിധിയെഴുത്തായിരിക്കും അഞ്ച് മണ്ഡലങ്ങളിലെയും ഉപതെരഞ്ഞെടുപ്പ് ഫലം. മണ്ഡലത്തിലെ എംഎൽഎയെക്കുറിച്ച് ജനങ്ങൾക്കുണ്ടായിരുന്ന അഭിപ്രായമാണ് അരൂരിൽ ലോക്‌സഭാ തെരഞ്ഞെടുപ്പിൽ, യുഡിഎഫിന് ഭൂരിപക്ഷം നേടിക്കൊടുത്തത്. അരൂരിൽ കെപിസിസി തെരഞ്ഞെടുപ്പ് ചുമതല നൽകിയിട്ടുള്ള മുൻ കേന്ദ്രമന്ത്രി കെ. വി. തോമസിന്‍റെയും പി. ടി. തോമസ് എംഎൽഎയുടെയും നേതൃത്വത്തിൽ ശക്തമായ പ്രചാരണ പ്രവർത്തനങ്ങളാണ് മുന്നണി നടത്തുന്നതെന്നും എം.ലിജു പറഞ്ഞു.