ആലപ്പുഴ: താഴത്തങ്ങാടിയില്‍ വീട്ടമ്മയെ തലയ്ക്ക് അടിച്ച് കൊലപ്പെടുത്തിയ കേസില്‍ കൂടുതല്‍ തെളിവുകൾ കണ്ടെത്തി. മൊബൈല്‍ ഫോണുകളും കത്തികളും താക്കോല്‍ കൂട്ടവുമാണ് തണ്ണീർമുക്കം ബണ്ടില്‍ നിന്ന് കണ്ടെത്തിയത്. പ്രതി മുഹമ്മദ് ബിലാലിൽ നിന്നും ലഭിച്ച വിവരത്തിന്‍റെ അടിസ്ഥാനത്തിലാണ് അന്വേഷണ സംഘം കായലിൽ തെരച്ചിൽ നടത്തിയത്‌. ഫയർ ഫോഴ്‌സിലെ മുങ്ങൽ വിദഗ്‌ധരുടെ നേതൃത്വത്തിലായിരുന്നു തെരച്ചിൽ. മൂന്ന് മൊബൈൽ ഫോണുകളും മൂന്ന് കത്തികളും ഒരു കത്രികയും, ആറ് താക്കോൽ കൂട്ടങ്ങളും കണ്ടെടുത്തു. കരയിൽ നിന്നും 50 മീറ്റർ അകലെയാണ് തൊണ്ടിമുതലുകൾ കണ്ടെത്തിയത്. ഇതെല്ലാം കൊലപാതകം നടന്ന വീട്ടിൽ നിന്ന് എടുത്തതാണെന്ന് കരുതുന്നതായി കോട്ടയം ഡിവൈഎസ്പി ആർ.ശ്രീകുമാർ പറഞ്ഞു.
താഴത്തങ്ങാടി കൊലപാതകം; മൂന്ന് മൊബൈല്‍ ഫോണും കത്തികളും കണ്ടെത്തി